No.7180/2020-2021

Vawiin khan Sakawrdai Community Health Centre-in damdawi in fai leh tha lawmman a lak lawmna School Education Minister Pu Lalchhandama Ralte-in a hmanpui.

He hunah hian School Education Minister chuan thusawiin Sakawrdai CHC-in damdawi in fai leh tha lawmman a la chu a lawmpui thu leh damdawi in chhunga  Doctor leh thawktute a chhuan thu a sawi. Minister chuan hmar khawthimah Sakawrdai CHC hian enna a rawn keng a, he lawmman hian mipuite thinlunga changkanna leh hmasawnna a rawn pholang a, a lawmawm hle a ni a ti. 

Minister chuan inthlan hma atanga a aupui thin  chu Zirna tha, hriselna leh kawngpui tha a ni tih sawiin chung zinga mi hriselna lamah Sakawrdai CHC in damdawiin tha lawmman a dawng thei chu lawmawm a tih thu leh sorkarin hma a lak chhoh zelnaah thawhhona tha an neih zel a beisei tih a sawi.

Minister chuan hmar tlangdungin zirna lama hma a sawn theih nan kawng hrang hrangin thawh zel a ni tih sawiin Zirtirtu indaihlohna phuhruk nan zirtirtu 80 chuang dah a ni tawh a, school 10 chuang sak a ni a, zirtirtu quarters 9 sak a ni a, Science zirna Darlawnah dah a ni a, HSS thar din a ni bawk a, Eklavia Model Residential School (EMRS) central sumin sak tum a ni bawk a ti a. Hmar tlangdung hi kawtchhuah thara siam turin Manipur nena inkalpawhna kawngpui cheng vbch 50 senna tur siam hna thawh tan a ni a, Cachar nena inkal pawhna kawngpui pawh buaipui zel a ni a ti bawk. Hmar tlangdung chu damdawi in fai lawmman bakah sorkarin khawfai lawmman a siam thin la thei ngei turin a fuih bawk.

Sakawrdai Community Health Centre lawmman lakte hi Kayakalp (Damdawiin fai leh tha) 2019-20 lawmman pakhatna, NHM Overall Performance Award ( PHC/CHC/SDH) 2019-20 lawmman pakhatna, Best Performing CHC Under Reproductive & Child Health (RHC) leh National Vector Borne Disease Control Programme lawmman pahnihna,  Overall Performance Award (Main Centre, Sakawrdai) lawmman pathumna te a ni. 

Sakawrdai CHC lawmman lak lawmna hi Sakawrdai CHC kawtzawlah hman a ni a, Sakawrdai CHC ah hian Doctor 3, Nurse 7 an thawk a, khum 24 an nei a ni.

Minister hian Sakawrdai VC House cheng nuai 20 senga sak thar chu a hawng bawk a, VC house hi a dung  42ft, a vang 30ft a ni.

Sakawrdai CHC lawmman lak lawmnaah hian Minister hi School Education Director Pu James Lalrinchhana'n a tawiawm a, Sakawrdai a VC leh NGO pawl hrang hrang hruaitute, thawktute leh Sinlung Hills Council  CEM leh Member thenkhatte an tel a ni.