106/2022-2023 

Aizawl 9th April 2022: Tukin zing khan Sports Minister Pu Robert Romawia Royte chuan a bial Aizawl East-II chhung Armed Veng South-ah MLA fund hmanga kawngpui siam thar leh Anganwadi Centre-IV sak thar a hawng.

Primary School Mual Welfare-in an Veng chhunga vantlang kawng pawimawh tak Primary School Mual Welfare Road RCC pavement-a  an bialtu MLA Pu Robert Romawian a MLA fund cheng nuai sawm lai senga a siamsak chu lawmawm an ti a. He kawng pawimawh tak hi mipuiten an chhawr tangkai a beisei thu Minister Pu Robert Romawia Royte chuan a sawi a ni.

Hemi hnu hian Sports Minister chuan Armed Veng South Anganwadi Cetre-IV, ICDS sum Rs 5,07,148/- leh bialtu MLA fund Rs 1,00,000/-, mipui thawh khawm Rs 38,900/- a vaiin Rs 6,46,048/- senga sak pawh a hawng bawk a ni.

Kawng hawnna leh Anganwadi Centre-IV thar hawnna ah hian Pu Robert Romawia Royte chuan thu sawiin, Anganwadi hi naupang chhun chaw semna leh nau awmna tur ringawt ni lovin, naupangte rilru leh taksa buatsaihna leh nu naupaite enkawlna a nih bakah naupangte an puitlin thlenga an nun bultanna leh chherna hmun a ni a, a ngaih pawimawh thu sawiin, hun remchang hmasaah a bial chhungah Anganwadi Games buatsaih a tum thu a sawi a. National School Education Policy, 2020-in zirna subject pangngai zinga subject pakhatah Sports chu dahin, tun hma aiin naupangte rilru leh taksa buatsaihna ah tan lak a tul a ni, a ti. Minister hian Armed Veng South YMA Hall tihlenna tur Rs 190 lakhs hmanga hnathawh tan thuai a nih tur thu sawiin, Armed Veng South MUP Rûn hnuai sakna tur Rs 2 lakhs MLA fund atanga a pek tur thu a sawi a. Covid-19 hripui leng avangin kum hnih zet bial hmasawnna hna thawk thei lova a awm hnuin tuna boruak a lo ziaawm tak ah hian thahnemngai leh chak zawka bial mipuite hmasawnna atana hna thawh a tum thu sawiin mipuite chu amah tawiawm turin a sawm a ni.

Minister hian Armed Veng South Basketball Club Jersey a tlangzarh nghal a, an hmabaka intihsiakna awm turah hlawhtlinna chang turin duhsakna a hlan a ni.

 Anganwadi Centre hawnna inkhawm hi Anganwadi Co-Ordination Committee Chairman leh Local Council member ni bawk Nl Lalchhanhimi'n a kaihruai a. Dr. Lalhruaitluangi Chhangte, CDPO, Aizawl Urban Area, Pu Lalthlantuma, Armed Veng South Local Council Chairman leh NGOs hruaituten an bialtu MLA chunga an lawmthu an sawi a ni.

Minister Pu Robert Romawia Royte hian Central Assistance for States Capital Expenditure (CASCE) hnuaia Rs 81 lakhs senga hnathawh tur pahnih, District Jail leh Armed Veng chuan hnuai kawng (Service Road) leh Armed Veng South Bazar leh CRP Field inkar kawng siam that dan tur a en nghal a, hetah hian Er. C.Lalthangvela, EE, Aizawl Road North, PWD leh official dangte bakah khawtlang leh party hruaituten an tawiawm a. Hemi zawh hian Govt Aizawl East High School tlawhin thuamthat ngaite a enpui a ni.