Sports Minister Pu Robert Romawia Royte chuan India hockey player, Lalremsiami, a pa Pu Lalthansanga Zotein a boralsan chu a tawrhpui thu a sawi rualin, India tana a tih tur hlen a, FIH Womens Hockey Series Final, Hiroshima-a India team a champion pui thei chu a chhuan thu a sawi.

June 21,2019 khan India hockey player  Lalremsiami pa, Pu Lalthansanga Zote chu heart attack vangin Kolasib-ah a boral a, hetihlai hian India chuan FIH Womens Series khelin semifinal-ah Chile an hmachhawn dawn a, a pa thih thu hian a thawngin a tuar hle. Heti chung hian a pa ruang pawh vuiliam thei lovin Japan-ah India-in 2020 Olympic Hockey a khelh theihna turin theihtawp a chhuah zui a, India champion puiin 2020 Olympic Qualifiers chu India-in a khel thei dawn ta a ni.

Hemi chungchangah hian Sports Minister Pu Robert Romawia Royte chuan, "Remsiami ka tawrhpui takzet a, Japan-ah India tan a fehchhuah laiin a pain a thihsan a a, chuti chunga India a champion pui thei hial hi ropui ka tiin ka chhuang takzet a ni. Khawvel huap inelna lian ber Olympic-ah Mizote kan tel leh ngei theih nan sawrkar chuan theihtawp a chhuah mek a, Remsiami hi Mizoram sawrkar chuan kan vauchher mek a ni. India leh Mizoram tihmingthatu a nih zel kan beisei a, a pain boralsan mahse Mizoram sports fanu a nih avangin kan thlahthlam dawn lova, chhawmdawlna kawngah pawh theihtawp kan chhuah zel dawn a ni" a ti.

India hockey team hian Japan chhuahsanin India an rawn thleng tawh a, thawhlehni (June 25) ah Remsiami hian an khua Kolasib a thleng ang.

Asian Games 2018-ah India team silver medal a lakpui avang leh Youth Olympic Games 2018-a silver medal a lakpui avangin Sports Minister Pu Robert Romawia Royte chuan May 30, 2019 khan Chanmari YMA Hall-ah  Incentive Cash Award Rs.20 lakh chu Lalremsiami hnenah a hlan a, India camp-ah a awm avangin he sumfai hi Remsiami nu leh paten an dawng nghe nghe a ni.