1130/2022-2023 

Lunglei the 2^nd July, 2022 - Vawin khan Sports & Youth Services Minister Pu Robert Romawia Royte chuan Serkawn leh Zotlang ah Integrated Semi Indoor Hall sak tanna turin Lungphum a phum a, Pukpui ah Standard Indoor Futsal Ground sak tanna tur Lungphum a phum bawk. Heng sports hmasawnna ruhrel siam thar tur te hi Sawrkar laipui Ministry of Minority Affairs hnuaia Pradhan Mantri Jan Vikas Karyakram (PMJVK) kaltlanga a zavaia cheng nuai 596.91 senga ruahman tur a ni. He hunah hian Lunglei North bialtu MLA leh MYC Chairman ni bawk Dr Vanlaltanpuia chu khualzahawm a ni.

Pukpuia Standard Indoor Futsal Ground tur hi khawtlang hruaitute, tlawmngai pawl aiawhte leh mipui kalkhawmte nen inrawn hona neih hnuah lungruang takin a hmingah Laldenga Futsal Ground tih a phuah nghal a ni. 

Lungphum phumna Function pathum te hi Lena Stadium Serkawn, Zotlang Indoor Stadium leh Chawngbawla Hall, Pukpuiah te neih niin Sports & Youth Services Secretary Dr Lalrozama, Lunglei DC Pu Kulothungan A leh official dangte bakah, Lunglei District MJA hruaitute, tlawmngai pawl hrang hrang aiawhte, khawtlang hruaitute leh sawm bik dang te an tel a ni.

Sports & Youth Services Minister Pu Robert Romawia Royte chuan "Covid hripui avanga sum harsatna avangin Central Sawrkar sawrkar atang a SYS Department in a sum hmuh te a hman nghal zung zung theih loh avangin Sports Project thenkhat a khawtlai lo theilova, tu ah erawh chuan Covid hripui a lo kian mek tawh avangin Lunglei khawpui a  Sports Project hrang hrang te pawh hna tan kim vek ani dawn ta a ni. Sawrkarin Lunglei District hmasawnna a ngai pawimawh takzet a, Lunglei Municipal Council (LMC) dinna Notification pawh a ti chhuak tawh a Lunglei Khawpui chu Sawrkar rorelna hmun (Seat of Government) a ni chho ve dawn ta a Lunglei mipui te ka lawmpui tak zet che u a ni" a ti.

Mizorama sports discipline hrang hrang leh sports infrastructure tih hmasawn zel kawngah Sports and Youth Services Department chuan theihtawp chhuak mek zelin hei hian eizawnna kawngah te, khawtlang mipuite hriselna kawngah te leh ruihhlo kan do kawngah te kan tha ti chak tu anih ngei a beisei thu a sawi a. Infiamna leh insawizawina te chu mitin nunna atana tha leh mitinte ta vek a ni tiin heng sports infrastructure siam mek leh siam thar tur te hi khua leh tui a duh apiang tan hman tangkai theih an ni dawn a ni, a ti bawk . Khawpuia cheng naupang leh thalaite an insawizawi tlem ta hle chu veiawm a tih thu sawiin SYS Department chuan Holiday Football Program – school chawlh ni a naupang a duh apiang an infiam theihna, Aizawlah bultan tum anih thu a sawi.   

Sports Project Lungphum Pathum te bak ah Serkawn a BCM hmunpui tih changtlunna tur Project pawh BCM hotute rawn chung zel leh an phalna in Pilgrimage Rejuvenation And Spiritual Augmentation Drive (Prasad Scheme), Ministry of Tourism atangin in principle Approval hmuh tawh a ni a, he Pilgrimage Project kaltlang hian BCM Headquarters, Serkawn chu Kohhran mi te leh khualzin te tan tlawh na awm zawk a siam tum a nih thu Tourism Minister Pu Robert Romawia Royte chuan a sawi.

Lunglei North bialtu MLA leh MYC Chairman ni bawk Dr Vanlaltanpuia chuan Lunglei North biala sports ruhrel din thar turte chu hmasawnna ropui tak a ni tiin he sports infrastructure lian tham tak neih theihna tura theihtawp chhuahtu Sports & Youth Services Minister Pu Robert Romawia Royte leh a thawhpuite chungah lawmthu a sawi a. Sports & Youth Services hmalaknain Lunglei District-ah cheng nuai 11,000 chuang  zet hu sports infrastructure thar kan nei tur hi District pum tan pawh hmasawnna rahbi pawimawh leh mellung chhinchhhiah tlak tak a ni, a ti a. 

Sports leh zirna hi thil kalkawp tlat an nih thu sawiin MYC Chairman chuan kan ram leh hnam a hmasawn zelna turin kan thalaite kan kaihhruaia, kawng kan kawhhmuh a tul hle a ni tiin Mizo thalaite hmasawnna turin MYC chuan theihtawp a chhuah zel dawn a ni, a ti a. Vision IAS, Delhi nen tangkawpin Super IAS 40 chu ruahman leh niin niminah mai khan result tih chhuah a ni a. He Super IAS 40 a tlingte hi Delhi-a coaching an kalna tur fee te leh Delhi an panna tur leh an hostel fee te tum sak vek an nih tur thu sawiin he hmalakna kaltlang hian kan Mizo thlalaite All India Service ah an tlin ngei a beisei thu a sawi a. Heng bakah hian Mizo thalaite tan state leh ram pawnah driver hna te, nurse hna te leh inhlawhfakna chi hrang hrang (blue collar jobs) te zawn sak mek niin Embassy of India, UAE hotute nen pawh an in dawr mek thu a sawi a ni.

Heng project thar tur te hi Ministry of Minority Affairs, Government of India hnuaiah Pradhan Mantri Jan Vikas Karyakram (PMJVK) kaltlanga ruahman tur an ni a. Project cost 90% chu Central tum tur niin, 10% chu State Sawrkar tum tur a ni. Ni 31.08.2021 khan Central atangin 1st Instalment dawn vek tawh a ni a.

Integrated Semi-Indoor Hall, Serkawn siamna tur atan hian Rs. 139.69 lakhs approval dawn a ni a. Tunah hian Tender tawh niin, he hnathawh tur atan hian M/S Junior Consultancy Services, Tlangnuam, Aizawl te thlan a ni a. Hna pawn tan thuai tum a ni ang. He Project hnuaiah hian Basketball Court, Volleyball leh Futsal te pawh khelh theihna tur Semi Indoor Hall tha tak sak tura ruahman a ni.

Integrated Semi-Indoor Hall, Zotlang siamna tur atan hian Rs. 139.69 lakhs approval dawn a ni a. Tunah hian Tender tawh niin, he hnathawk tur atan hian M/S Junior Consultancy Services, Tlangnuam, Aizawl te thlan a ni a. Hna pawh tan thuai tum a ni. He Project hnuaiah hian Basketball Court, Volleyball leh Futsal te pawh khelh theihna tur Semi Indoor Hall tha tak sak tura ruahman a ni.

Construction of Futsal Ground, Pukpui siamna tur atan hian Rs. 317.53 lakhs approval dawn a ni a. Tunah hian Tender tawh niin, he hnathawk tur atan hian M/S Creative Minds, Chanmari West, Aizawl te thlan a ni a. Hna pawh tan thuai tum a ni. He Project hnuaiah hian Semi Indoor Futsal Ground tha tak siam tum a ni a. Player's Changing Room leh Gallery te pawh dah tur niin, Futsal Ground hi International Standard Sports Flooring phah tura ruahman a ni.

Vawiin vek khan Sports & Youth Services Department leh Serkawn VC-te chuah Lena Stadium enkawl chungchangah Memorandum of Agreement for Lena Sports Stadium at Serkawn thuthlung an ziak a. SYS Department aiawhin Secretary Dr Lalrozama leh VC aiawhin Serkawn VCP Pu K. Zodinsanga ten an sign a. SYS Joint Director, DSYO, Branch YMA Serkawn President leh Young Peoples Club Serkawnhruaitu te chu hriatpuitu niin an hming an sign bawk a ni.