1128/2022-2023

Khawzawl, the 2nd July, 2022: Vawiin chawhma khan Khawzawl District Bawrhsap Pu C.C. Lalchhuangkima chuan National Highway (NH) 6 siam mek, Khawzawl atanga Champhai panna Tuimuk lui kama kawng siam leh hemi avanga harsatna thlengte a hmunah kalin a enfiah a, harsatna chinfel dan tur kawng siamtu leh leilet neitute a sawipui.

Pu C.C. Lalchhuangkima chuan leilet phai neituten kawng laih avanga harsatna an tawhte a hmunah kalin a enfiah a, harsatna an tawhte lo hrilhfiahin a tul anga hmalak dan turte a sawipui a. Buh phun hun tawh, NH 6 kawng laih avanga buh la phun thei lo leilet neitute harsatna chinfel leh tanpui dan turte he hunah hian sawiho a ni a. Bawrhsap chuan kumin chhungin loneituten buh an chin hman ngei theih nan hmalak a nih tur thu a sawi a. Tunhnai ruahsur avanga leimin leh thil dangin NH 6 siam mek a tih chhiatte pawh enho niin, hmalak dan turte sawiho a ni bawk.

District Bawrhsap hi SDC Pu Obed Lalmalsawma, Nodal Officer, DM&R, Pi Lalremruati, SDO, I&WRD bakah NHIDCL leh Shri Balaji Construction Company hotuten an tawiawm a ni.