1127/2022-2023
Aizawl 2nd July 2022: Deputy Chief Minister Pu Tawnluia chuan Co-ordination Committee PHED leh CYMA buatsaih Tlawng Lui Fintu Lui Thenfai Hnatlangpui chu vawiin chawhma khan Vanapa Hall kawtah a vailiam.
Deputy Chief Minister chuan thu sawiin Tlawng Lui hi Zobawk dai atanga hnar neiin, Cachar ram ri thlenga luang lui a ni a, km 186 a thui niin district 5 paltlang in, khua 90 chuang paltlang Lui a ni a, Mizoram Lui pawimawh leh a bikin Aizawl leh Lunglei District ah phei chuan kan rin rawl, tui intur min chawmtu kan ti thei hial a ni a ti a. Vawiin hnatlang pawhin a tum chu Tlawng Lui Fintu Lui hnar lo tih fai lawk a, Tlawng ah tui thianghlim zawk mipui tan hniang hnar taka a awm theihnan leh luitui a bawlhhlawh tam ber plastic atanga thilsiam chhuah hman tlem inzirtir a ni, a ti a. PHED chu mipuite tui intur ngaihtuah tu department kan ni a, vanneihthlak takin Mizoram chhung khawtinah tui thianghlim pek bakah, tui connection Jal Jeewan Mission kaltlangin kum 2023 ah connection pek vek a ni dawn a ni a ti a. Tui thianghlim neih a pawimawh ang chiahin bawlhhlawh paih kawngah pawh mitinin mawhphurhna kan nei a ni tih hria ila, PHE Department Engineer ten nitin Tlawng Lui teh in record tha tak an nei a, heng record atanga a landanin thal laiin tui kan nghei hlauhthawn awm chang a awm thin a, heihian tui hna venhim bakah vawnhim leh humhim a tul zia a tarlang a. Vawiin hnatlang hi tih makmawh a ni a, CYMA nena tangkawpin hnatlang koh zel pawh la a la nih tur thu sawiin tui hi mihring tan mai nilo thil nung reng rengin kan tlak chham chuan a thlakthleng tu pakhatmah awmlo a ni a, kan nunna a tana lo theihloh a kan neih ngai a nih avangin, tui thianghlim leh tui a lo tlem loh nana tui hnar humhalh leh tih bawlhhlawh loh hi kan tum tak zet zet tur a ni a, heng kawngah hian pawl emaw sawrkar kan pa pek tur a ni lo a, chhungkua zawng zawng hian mawhphurhna kan nei tih hria ila, kan tih theih tawk ti tura inpeihin hnatlang hian mipui rilru chawktho in vawiin hnatlang a kal zawng zawng te duhsakna a hlan a ni.
Tlawng Lui Fintu Lui thenfai hnatlang ah hian MLA Pu Lalrindika'n a tel pui a. Coordination Secretary Er H. Duhkima chuan a kaihruai a, CYMA General Secretary Prof Lalnuntluanga leh Vice President Pu Lalhmachhuana hnen atangin thusawi tawi ngaihthlak a ni a, vawiin hnatlang hian mizo mipuite ah rah tha chhuah se, kan chenna environment humhim kawngah CYMA chu a tlan chhe ngai dawnlo tih sawiin, vawiin hnatlang hian zoram chhungah tui thianghlim kan neih belh zelna turin kan chet chhuah a ngaih zia a tarlang a, luidung then thianghlim hnatlanga tawp mai lo a, lui dung ti bawlhlawh plastic hman tih tlem kawngah mitinin mawh kan phur a ni tih hriat a pawimawh thu an sawi a ni.
Vawiin hnatlang hi hmun hrang hrang - Sakhisih Lui, Kulikawn; SAI thlang, Mission Vengthlang; Tlawng Road (Reiek); Vailui Hnar, Bungkawn; Tuikual Lui Fintu, Maubawk & MINECO inkar; Tuikual Lui, Ebenezer Hospital bul hnai; Tuikual Lui (Tuithum), Lawipu; Dinthar Lui, Ebenezer Hospital bul kawr; Hnimtheilo Lui, Chawnpui/Zonuam; Tuithum, Chawlhhmun; Sihhmui Kai ah Branch YMA hrang hrang 106 atangin mi 10 theuh an hnatlang bakah PHED thawktu mi 200 chuang an hnatlang a; Tlawng Lui thenfai bakah Tlawng kamah thing 250 vel phun a ni. Vawiin vek hian Serchhip leh Lunglei District-ah te hnatlang YMA Branch hrang hrang ten an nei bawk a ni. PHED leh CYMA te hi kum 10 chuang an thawk ho tawh a ni.
Attachment
- Loading attachment...
