Ni 5 chhung awh Mizoram Civil Services Sports & Cultural Association huaihawt 30th Annual Sports Meet 2017 (Inter-Departmental) chu nimin 16th September 2017 khan zawhfel a ni a, Sports Minister Pu Zodintluanga'n Sports Meet kharna hun a hmanpui.
Khuallian Sports Minister Pu Zodintluanga chuan Sports thiamna avanga thalaite sawrkar department-a hna thawhna remchang petu Department hrang hrang hnenah lawmthu a sawi a. Sports Meet hian sawrkar department hrang hrang thawktute thawhhona tha siam se chu chu mipuiin chhawr se a duh thu a sawi bawk. Champion leh Medal ai mahin thalaite in phochhuak theihna hun petu nih leh thawhhona tha mipui tana rah tha thlen tur neih theihna a pawimawh a nih zel a beisei thu a sawi a. Thalai infiammite chawisan an ni chu lawmawm a tih thu sawiin thalai player chhuanawm sports lama tihthat avanga eizawnna nei tam tak an awm a, Muster Roll lakte a har chungin sports lama ti that department hrang hrang ah duhsak an hlawh thin avangin Sports & Youth Services Department changtu Minister a nihna angin lawmthu a sawi.
Minister chuan thu a sawi zelnaah Vaivakawn kawng chep tak zauh leh MZU Tanhril lamah khawpui zauh zel chu duhthusam a ni a, a huphurhawm viau naa UD&PA, PWD, P&E, PHED & BSNL te thawhhona avangin awlsam takin hmalak mek zel a ni, a ti a. Chutiang bawkin Republic Veng-a Pi Pangi Peng te pawh UD&PA hmalakna mah ni se department tam tak thawhhona tha vangin zauh a ni thei a, Bawngkawn kawng peng pawimawh takte pawh siam tumin hma lak mek a ni, a ti.
Sports Meet khatna hun hi Pu Zothanmawia, President, MCSS&CA chuan a kaihruai a. Pu Rosangliana, General Secretary chuan Sports Meet report pein Pu PC Lallianthanga, Vice President-in lawmthu sawiin hun a hman hnuinn medal leh trophy sem zui a ni.
R.Dengthuama Indoor Stadium-a neih MCSS &CA Sports Meet-ah hian Mizoram Police Department chu a pumpuia titha ber an ni a, PHE department pahnihna niin PWD chu pathumna an ni. Sawrkar department 60 vel an tel a; inelna hi Badminton, Table Tennis, Chess, Carromboard, Shooting leh Chinese Checkerboard te neih a ni.
A pumpuia ti tha ber Police department chuan gold 11, silver 8 leh bronze 13, a vaiin medal 32 an dawng a. Pahnihna PHE department chuan gold 5, silver 4 leh bronze 3, a vaiin medal 12 an dawng. Pathumna PWD chuan gold 5, silver 1, bronze 1, a vaiin medal 7 an dawng ve thung.
SYS, Accounts & Treasuries, Lottery leh Transport department tangkawp SALT chuan gold 4, silver 1 leh bronze 1 an dawng bawk a. Power & Electricity department chuan gold 3, silver 3 leh bronze 3 dawngin heng department te hi ti tha zual top 5 te an ni.
Attachment
- Loading attachment...
