Bharat Scouts & Guides North East Mini Jamboree vawi 6-na chu vawiin khan Sports & Youth Services Minister Pu Zodintluanga’n State Training Centre, Tanhril-ah a hawng.

 

 

Hmarchhak bial state hrang hrang atanga Scout leh Guide naupang te chuan mahni hnam lam theuh entirin Minister hi an lo lawm a. Thuchah sawiin Pu Zodintluanga chuan hmarchhak bial tana Jamboree neih chuan state hrang hrang te inkara inpumkhatna leh inunauna a tinghet  lehzual dawn a ni, a ti a. Mizoram tan hetiang intawh khawmna hi chhinchhiah tlak a ni, a ti bawk. Scouts lo din chhoh dan tarlangin Pu Zodintluanga chuan kum 1907 a Robert Baden Powell-an Brownsea thliarkara naupang 20 rual vel lek te nen bul a lo tan atanga Scout movement in khawvel pum a tuam chhoh dan leh  India ramah chuan Bishop Cotton’s Boy’s School, Bangalore atanga bul tan a nih dan a sawi a. Hmun kilkhawr zawkah darh zelin tunah chuan Mizoram pawhin Scouts & Guides changtlung tak a lo nei ta chu lawmawm a tiin a tha zawnga thalaite nun kaihruaitu a nihna chu ngaihsanawm a tih thu a tarlang a. He pawl hnathawh leh hmalakna chuanawm taka tel te leh thawktu zawng zawngte chungah lawmthu sawiin naupangte chu an vanneih zia inhria a, hetiang hun tha hi hlawk taka hmang tangkai turin duhsakna a hlan bawk a ni.

Jamboree hawnna inkhawmah hian Pu Zoliana Royte, Jamboree Chief & State Chief Commissioner chuan  inlawmna thuchah sawiin Mizorama Bharat Scouts & Guides hmasawnna pawimawh deuh deuh te a tarlang bawk a. R.K.Kaushik, Jamboree Organiser & Asst. Director, N.E Regional Hqrs. chuan report pe in Manipur, Mizoram leh N.F.Railways naupang ten hnam lam an entir a ni.

Hmarchhak pual bika North East Mini Jamboree hi kum 2001 khan Malegaon ah neih tan niin tun tum hi Mizoram-in a thlen vawi khatna a ni a. Tripura tih loh hmarchhak state dang zawng atangin Scout leh Guide naupang 528 leh official 100 chuang telin official 50 chu Mizoram pawn lam atanga lo kal an ni. Jamboree ah hian hnam inpumkhatna leh inhriat pawhna tura intihsiakna chi hrang hrangte bakah adventure leh infiamna lama state inelna chi hrang hrangte neih a ni ang.