Vawiin chawhnu khan Sports Minister Pu Zodintluanga Office chamber-ah ‘NEC Chairman’s Sports Award for Excellence’ semna hun hman a ni, he Award in pawisa fai a ken tel chu Pu Zodintluanga hian infiammi sawm (10) hnenah a hlan nghal a ni. Lawman semna programme tawi hi Pu Lalzirmawia Chhangte, Director Sports & Youth Services Department in a kaihruai.

Pu Zodintluanga chuan infiammite chu ram leh hnam tana fehchhuak an nih angin Mizo mipuiin an chuang hle thu a sawi a. Catch Them Young policy kalpuina kawnga Sorkar leh Sports Association hrang hrangte thawhhona a that avangin infiamna lama result tha a awm chho mek zel chu lawmawm tiin duhtawk mai lovin tan lak zel a pawimawh thu a sawi. Minister hian kumin atangin Catch Them Young policy hnuaia a bultan nan Badminton leh Table Tennis thiam fal bikte chu lak hran a, a hranpa liau liau a Intensive Training pek an nih tur thu a sawi bawk ani.

Minister hian Inelna hrang hranga medal la tam zawk - silver leh bronze latu te hian pakhatna (gold) la thei dihmun ah an ding reng a mahse an lak theih lohna chanzawn a tul thu a sawi a. Sports Association hruaitu te chu national level a intah luh a tul thu a sawi bawk a ni.

34th National Games 2011-a Medal la te he Award dawngte chu – Lalmuanpuia Silver Medalist (Boxing, Men 64kgs); Lalramngeni Bronze medalist (Boxing, Women 60 kgs); Jenny R. Lalremruati Bronze medalist (Boxing, Women 75 kgs); F Lalthanpuia Bronze medalist (Karate); Lalrawngbawla Bronze medalist (Karate) leh Lalhlimpuia, Lalrosanga, Lalhmingmawia, PC Lallianmawia leh Lawmzuala Bronze medalist (Sepaktakraw vek) te an ni. Silver Medalist hian cheng nuai 2 an dawng a, Bronze Medalist zawng zawng hian cheng nuai khat theuh an dawn a ni.

North East Council chuan North East States-a infiammi, National leh International level a medal la te tanpui nan, chawimawi nan leh tihphur zel nan ‘NEC Chairman’s Sports Award for Excellence’ hi siam ani. He Scheme hnuaia Award la thei tur te chu Director, Sports & Youth Services Department chuan NEC ah dilpuiin, 23rd March 2012 khan a hnuaia infiammi, 34th National Games 2011-a medal la te hnenah cheng nuai sawm pakhat a rawn pe.

Vawiina lawmman semna programme ah hian karate, boxing leh sepaktakraw Association hruaitute pawh an tel bawk a ni.