798/2023-2024

Aizawl 14th June 2023: Vawiin khan India hmarchhak State NSS volunteer-te intawhkhawmna hun ‘North East NSS Festival 2023’ hawnna inkhawm chu Seminar Hall, Pachhunga University College-ah neih a ni a; he hunah hian Pu Robert Romawia Royte, Minister of State, Sports & Youth Services Department chu khuallian a ni.

Khuallian chuan NSS Volunteer-te chu Mizoramah lo lawmin, Mizorama an cham chhungin nuam leh hlim taka hun hmang turin duhsakna a hlan a. North East-a college tha ber, India ram pumpuia 34th ranking hauhtu Pachhunga University College (PUC) ngeiin festival a thleng thei chu NSS Festival 2023 a tihlu leh zual a ni, a ti. India hmarchhak state-a NSS-ten intawhkhawmna hun tha tak an nei thei thin chu thil hlu tak a ni tiin State hrang hrang hnam ziarang inzirtawnna leh thiantha insiamtawnna hun atana hmang turin NSS Volunteer-te chu a chah. Mizoram State NSS hmalaknate chu rampum ang pawhin entawntlak tak a nih thu leh Mizoram state chhunga pawl intelkhawm hrang hrang zinga a mamawhte tan a thisen pe hnem ber NSS volunteer-te an ni fo chu ropui a tih thu a tarlang. Minister chuan NSS Manipur te an lo tel ve thei lo chu pawi a tih thu a sawi a, hei hian tun dinhmunah hmarchhak state-te inlungrualna leh thawhhona tha a pawimawhzia a tilang chiang hle ni a ti. Hmarchhak state-a cheng hnam hrang hrangte inkarah inhriatthiamna leh inunauna tha zawk a awm theih nan theihtawp chhuah a ngai a, North East NSS-te pawhin an theihna zawn apiangah hma la turin a sawm bawk.

Pu Robert Romawia Royte, ICT Minister ni bawk chuan Hmarchhak state NSS Volunteer kalkhawmte chu Social Media hman chintawk thiam turin leh thil tangkai atan hmang thiam turin a fuih a. Social Media hmansualna avanga an nunin a chhiatpui lohna turin Information Technology Act leh Cyber law-te pawh zirchiang a, fimkhur phah nan a hmang turin a chah a ni. Khawvel inelna sang tawh takah hlawhtlinna nei tur chuan harsatna leh chona hrang hrangte a eng zawnga thlir thiam mi nih a pawimawh thu a sawi bawk. Infiamna lamah pawh hmarchhak state te chuan theihna sang tak an nei a, chu chu a takin hmuh mek a nih thu sawiin hmarchhakin infiammi a neih ang angte chu ngaihlu tur leh chawimawi thiam turin NSS Volunteer-te chu a sawm a ni. Infiamna hian taksa leh rilru hrisel a siam thin tih hria a, infiamna leh taksa sawizawi pawh ngai pawimawh turin a chah. Thalaite chu tumna mumal tak nei turin leh chung tumna tihlawhtling tur chuan tih tur leh ngaih pawimawh hmasakte thliar thiam a, NSS thupui 'mahni aia midangte dah hmasak' chu a taka nunpuitu nih tum zel turin a fuih bawk.

Tourism Minister ni bawk Pu Robert Romawia Royte chuan Mizoram chu ‘Happiest State’ a nih thu tarlangin tlangram mawi tak, zin mite tana tlawh tur hmun nuam tak tak awmna a ni a ti a. State pawn atanga lo kalte chu an chhungte leh thiante hruaia rawn zin leh ngei turin a chah bawk a ni.

Pu F. Sangvuana, State NSS Officer, NSS Cell, Mizoram chuan report pein kum 1972 khan NSS chu PUC ah din niin, Mizoram State NSS Cell pawh kum 1988-ah din tan ni bawkin tunah hian thawktu mi 8 an awm mek a ti a. NSS Mizoram hian kum 2022-2023 chhung khan blood donation vawi 88 neiin thisen unit 6002 an lo pe tawh bawk. Thisen pek bakah hian thingphun leh enkawl, vantlang leh khawpui tihfai, awareness campaign an kalpui thin a, kum tinin Annual Report-chhuah thei bawkin North East NSS zinga kum tina report chhuah thei awm chhun an nih thu a tarlang. Mizoramin North East NSS Festival hi vawi 5 a thlenna niin tun festival hian ni 13-17 June chhung huamin hmarchhak State NSS atang hian volunteer mi 280 vel an lo tel tur thu a sawi.

India hmarchhak State NSS Volunteer-te intawhkhawmnaah hian NSS Manipur tih loh hmarchhak State NSS Volunteer-te an telkim thei vek a ni. Vawiin NE NSS Festival 2023 hawnnaah hian Dr. Lalzarmawii, Programme Officer, NSS Govt. Aizawl North College chuan kalkhhawmte lawmna thu sawiin, Mizoram, Assam leh Sikkim NSS Volunteer-ten special item an nei a. Dr. K. Vanlaldinpuia, Programme Officer NSS PUC chuan lawmthu sawiin hun hnung a khar a ni.