Sports & Youth Services Minister Pu Zodintluanga chuan vawiin khan North East NSS Youth Festival, Art & Culture Auditorium, Berawtlang a buatsaihah khuallian niin a hawng. He hunah hian Parliamentary Secretary Pu Hmingdailova Khiangte chu khualzahawm a ni a. He festival hi NSS (National Service Scheme) Regional Centre (NER), Guwahati leh NSS (Cell) Mizoram, Sports & Youth Services Department tangkawpin an buatsaih a ni.
Khuallian chuan thu sawiin, NSS volunteer ten tanpui ngai te tanpuia midang tan hmasawnna thlen tura an thawh thin hian anmahni ah pawh ngaihtuahna leh mizia ah hmasawnna tha tak a siam thin avangin NSS hmalakna chu thalaite kaihruaitu tha tak anih thu a sawi a. Kum thum chhung a zawn in Mizoram ah North East NSS Festival nghah a nih chu lawmawm a tih thu sawiin, India Hmarchhak state hrang hrang atanga NSS Volunteer ten an hnam zia rang hrang hrang te inhriatsak a inzir tawn sakna hun remchang an nei chu hmang tangkai turin a chah a. India Hmarchhak state hrang hrangte chu inunauna tha tak nei a chhawm nung zel tur kan ni tiin, Sports Minister chuan North East mi nih vanga State dangte aia hniam bik riau anga inngaihna kan nei tur a nilo, a ti a. Thalai kalkhawmte chu nun ze mawi leh zahawm tak leh aia upate zahna hre chungin leh kan chawr chhuahna theihnghilh lovin, hma sawnna kawng zawh zel zawk turina sawm a ni.
Parliamentary Secretary Pu Hmingdailova Khiangte pawhin Festival chhim tura kalkhawmte chuan a hlawk thei ang bera hun an hman a duhsak thu a sawi a. India hmarchhak mite hian India ram danga en hran te tawkin, harsatna hrang hrang tawk an awm thin chu pawi a tih thu sawiin, India Hmarchhak a chengte min hmuh dan thlak danglam turin leh, kan nun ze mawi, kan taimakna leh kan thluak tha tak tak te hi India ram mipuiin zau zawka an lo hriat theih nan thalai kalkhawmte chuan chu chu an mawhphurhna a la turin a sawm a ni.
Vawiin NE NSS Festival hawnna hun hi Pu H.L. Rochungnunga, IAS, S&YS Secretary chuan kaihruaiin, Prof. P. Rinawma, Programme Co-ordinator NSS (Cell), Mizoram University leh Pu Sunil Kr. Basumatary, Regional Director, NSS Regional Directorate (NER) atangin thu sawi ngaihthlak a ni bawk a. He NSS Festival participant-te hi nimin khan lo thleng khawmin, 25.11.2016 (Zirtawpni) hian a kharna hun neih a ni ang a. Festival chhung hian Cultural progemme bakah Human Trafficking, Voluntary Blood Donation, Mental Health, HIV/AIDS Awareness leh topic dangah zirtirna neih a ni dawn bawk ang.
NSS hi September ni 24, 1969 khan khatih hun laia Union Minister Dr. V.K.R.V Rao khan a din a. Mizoramah chuan 1972 khan din tan niin, college zirlai tam tak an inziaklut a. Tun dinhmunah hian Mizoramah NSS Unit 321 awmin, volunteer 23,100 chuang an awm tawh a ni. NSS hian a tum ber pakhat chu khawtlang tana tangkai thei tur hna hrang hrang tlawmngaia thawk a, chumi hmang chuan thalaite nun kai hruaia ‘personality development’ tha tak siam a ni.
