Vawiin khan Sports Minister Pu Zodintluanga chuan a chenna inah Republic Day Camp, New Delhi-a India Hmarchhak bial pumpui aiawhtu, North East Region NCC Band te chu lenga sawmin inkawmhona leh thingpui inhona a neihpui. Norh East Region NCC Band ah hian Govt Mizo High School a Class 9 zirlai 37 awm mekin an ni hi Govt High School Pipe Band ti a kan hriat thin te kha an ni.
He hunah hian NCC Pipe Band member mipa 20, hmeichhia 17 leh anmahni hruaitu Associate Nodal Officers (ANO) pahnih Pu Lalbiakzuala leh Pi Lalthakimi bakah Pu Lalrammawia , Headmaster, Govt. Mizo High School te pawh an tel a ni.
Sports Minister chuan India hmarchhak aiawha NCC Pipe Band kal te chu a chhuanthu sawiin Mizoram tihmingthatu an nih thu a sawia. An hlawhtlinna chu thil naranlo tak, a tel tur thlanna pawh hautak tak ani tiin hlawhtlinna atanga hlawhtlin leh zualna nei turin duhsakna a hlan. Mizo thalaiten tum mumal tak an neih a tul thu sawiin kawng tinrengah hlawhtlingtur chuan taihmak, tumruh, hahfalbik leh harsatna paltlang angai ani a ti a. Mizo zirlai ten Republic Day, ni pawimawh bik leh Rajpath ah te Brass Band display an la neih theih na turin Brass Band Instrument leh hmanraw tul dangte sorkarin a ngaihtuahsak mek ani a ti.
NER NCC Band leh Sports Minister inkawmna ah hian Pu Lalrammawia, Headmaster, Govt Mizo High School chuan report tawi a pe a. Hunreitak ata tawh Mizo NCC Band te, Delhi ah an Camp thin thu tarlangin anmahni tlawhtu la awmchhun, Sports Minister in tha taka a lo dawnsawn avanga lawmawm atih thu a sawia. NER NCC Band te hian thla 2 chhung New Delhi ah camp an nei tih tarlangin Prime Minister’s Rally bakah Chiefs of Staff - Army, Navy leh Air Forces te guard of honour ah te parade in Band display an nei tih a sawi. Kumin hi Republic Day Camp vawi 11 an neihna niin PM’s Rally ah phei chuan NER NCC Band te hi Permanent Contingent an ni mek a ni.
