Mizoram Sports & Youth Services leh Mizoram State Sports Council bultuma Mizo infiammite tana Sap tawng zirna programme '4-Week Course in English for Specific Purpose (ESP) for Sportspersons' chu vawiin khan SCERT Auditorium-ah Sports Minister Pu Zodintluanga'n a hawng. Thla khat chhung awh tur he Course ah hian SCERT hnuaia Mizoram Institute of Spoken English State Council of Educational Research & Training ten Spoken English training an pe ang a, Mizo Sports Association hrang hrang atangin infiammi 84 an inziak lut a ni.

Hawnna thuchah sawiin Sports Minister Pu Zodintluanga chuan tun hnaia Mizoram-in a tha zawnga danglamna ("change") a hmuh te zingah Sports mite tan chuan 'Catch Them Young Programme' leh vawiina hawn tak infiammite tana sorkarin tawng lama an harsatna sukiang tura hmalakna pawimawh tak mai te hi an tel a ni, a ti. Mizo infiammiten talent tha tak neiin state/ram pawnah te fehchhuak thin mahse tawng lama harsatna an nei thin hi an mutan a ni fo tih hriain Sports Department chuan SCERT nen tangkawpin infiammite tan he Course hi an buatsaih a, English bakah Hindi tawng zirtirna pek an nih leh tur thu a sawi bawk. 'Catch Them Young' hnuaia thiam bikte tan national/international coach chah chhuak thei turin sorkar a inpeih reng thu leh hemi atana sum pawh dahhran a nih tawh thu a tarlang a. Naupang chuan lehkhazirna lama thiamna a mamawh ang bawkin taksa lama insawizawi thatna a mamawh a, chuvangin Education leh Sports Department chu thawkho reng tur an nih thu leh an thawhhona a that poh leh mi hmantlak leh hnam tihming tha tur kan chherchhuak thei dawn a ni, a ti bawk. He Course-a inziak lut infiammite chu thuawi tak, taima tak leh tih takzetna nena an zirna hlen turin a duhsakna a hlan a ni.

Hawnna inkhawma tel ve Mizoram State Sports Council Secretary Pu Lianzuala pawhin thu sawiin SCERT nena infiammite hmasawnna pen khat an pen belhsak leh thei chu a lawmawm a tih thu leh phur taka an buatsaih a nih thu a sawi a. Mizo infiammite tan "Fitness Seminar" buatsaih thuai a ni ang, a ti. September ni 12-15 chhunga Nashik, Maharashtra-a National Sub-Junior Fencing Championship neih zawh takah khan Mizo player ten Gold-1 leh Bronze-2 an dawn thu a sawilang bawk.

Jt. Director, SCERT Pi Laldawngliani chuan Course chungchang hrilhfiahna leh tunlai khawvela English pawimawhna te a sawi a. SCERT hmalakna hrang hrang te tarlangin vawiina infiammite tana Course an buatsaih hi SCERT pawhin a chhuangin theihtawp chhuah sak an tum thu a sawi bawk.  

Vawiin Course hawnna inkhawm SCERT Director Pi Malsawmthangi kaihhruaiah hian '4-Week Course in English for Specific Purpose (ESP) for Sportspersons' atana a bik taka hman tur lehkhabu SCERT-in a buatsaih chu Sports Minister-in a tlangzarh nghal a ni.