Vawiin khan Panchayati Mahila Shakti Abhiyan (PMSA) buatsaihin Chanmari YMA Hall ah Aizawl Municipal inthlan lo awm tur a hmeichhe Ward huamchhung a awm tur VC leh khawtlang hruaitute tan  inhrilhhriatna leh zirtirna (training) hun hman a ni a. UD&PA Minister Pu Zodintluanga chu khuallian niin Training hi a hawng a, Dr. Lalneihzovi lehkhabu ziak 'Municipality Inrelbawlna Mizoramah' tih chu a tlangzarh nghal bawk a ni.

Pu Zodintluanga chuan hmeichhiate chu chhungkua leh khawtlangah an hlu in an pawimawh em em a, ram inrelbawlna chungchangah pawh hmeichhe ropui tak tak ten hnuhma tha tak an lo hnutchhiah tawh thin a, an la chhunzawm zel a ni a ti a. Mizo hmeichhiate pawhin Municipal Council inthlan lo awm tur a hmeichhe pual bika siam seat an neih te chu chhawr tangkai a, sulsutu tha tak an nih theih ngei a duhsak thu Minister chuan a sawi a, tihtakzeta an finna leh chakna te thahnemngai taka ram tan a hmang zel turin a fuih a ni.

Pi Zothankimi, PMSA Core Committee Member pawhin lawmna thuchah sawi pahin PMSA chu rorelna a hmeichhia te tichak tur a hmala tu pawl a nih thu a sawifiah a ni.

Hawnna inkhawm hi PMSA Core Committee Chairperson Dr. Lalneihzovi'n a kaihruai a, UD&PA Secretary, Mizoram Municipal Council CEO leh  mipawimawh dangte an tel a ni. Training-ah hian Pu Sangliankhuma, CEO-Mizoram Municipal Council, Prof. Lianzela, Dean SEMIS, Mizoram University leh Dr. Lalneihzovi, Reader, Mizoram University  te paper buatsaih zirho a ni a, zawhna leh chhanna hunin a zui a ni.