Vawiin chawhnu khan Sports Minister Pu Zodintluanga chuan Aizawl Tennis Club, Semi Indoor Tennis Stadium sak thar a hawng. 

Pu Zodintluanga chuan Mizoram sawrkarin hun reilote chhungin hmasawnna hna thahnem tak a thawk a, thingtlang leh khawpui chhungah hmasawnna ruhrel ding thar hmuh tur tam tak a awm a, sports lamah phei chuan hmasawnna a tam lehzual, a ti. Champhai, Kolasib leh Lungleiah Stadium puitling, 8 lane athletic track chhunga artificial grass, a entu mipui thutna tur gallery changkang tak neih theihna tur siam zawh tep tawh niin Serchhip Stadium a artificial grass phah tur pawhin Kolkata a thleng tawh, Sports Minister chuan a ti a. Sports Association hrang hrangten an puala hall an neih theih nan ruahmanna a kal mek thu te, Saron veng Indoor Stadium karleh inrinniah hawn tum a nih thu te; Armed Vengah basketball court len theihna tur Stadium, Lungleiah Zaua Memorial Tennis Court leh Thorangah Tennis Court pali siam zawh tep a nih thu te bakah District Capital leh thingtlang hmun hrang hrangah sports complex leh indoor stadium sakna tur ruahmanna siam mek a nih thu Minister chuan a sawi bawk.  Pu Zodintluanga chuan a fur a thal, chhun leh zana tennis khelh theihna tur Aizawl Semi Indoor Tennis Stadium hawn a ni ta chu lawmawm tiin thalai ten an vanneihzia hria a, intihhlimna atan chauh nilo, khawvela Zofate hming tithatu an nih theih nan Tennis Court chu hmang tangkai turin a sawm a. Aizawl Tennis Court bakah hian Salem Vengah Court dang pahnih siam theihna tur leh Rajiv Gandhi Stadium sirah court pathum vel len theihna tur hmun en mek a nih thu a sawi bawk a ni. 

Parliamentary Secretary Pu Hmingdailova Khiangte pawhin thalaite khawvel siam tura sawrkar hmalakna tam tak zingah tennis court tha tak hawn a lo ni leh ta chu lawmawm a tih thu sawiin sawrkarin thalaite tuihalna leh mamawhna hriain Mizoram hmun hrang hrangah sports infrastructure thar a ding zung zung a ni, a ti a. Tun dinhmunah sports lama Mizoram mamawh pawimawh zual chu a kim thawkhat tawh a ni, tiin Parliamentary Secretary chuan heng hmunhma sawrkarin a buatsaihte hi tangkai taka hmang turin infiammite a sawm a ni. 

Semi Indoor Tennis Stadium sakna tur hian Special Plan Assistance atangin sawrkar chuan cheng nuai 100.80 pein, kum 2015 May ni 25 atang khan sak tan a ni a, October ni 12, 2016 ah zawh fel a ni. Stadium dung hi metre 37, a vang metre 18.70, a zau zawng 691.9sqms. a ni a. A chung hi a hniam lai berah metre 9.50 niin a sang lai berah metre 11.70 a ni. A chung dyna roof, a chhuat rubberised synthetic flooring niin zanah pawh inkhelh theih turin Indoor Lighting System siam a ni a. Heng hnate hi March ni 7, 2017 ah zawhfel a ni. 

Aizawl Tennis Club, Semi Indoor Tennis Stadium hawnna inkhawm hi Sports Secretary Pu HL Rochungnunga’n a kaihruai a, Mizoram State Sports Council Secretary Pu C.Laltlanthanga’n technical report a pe a,  Aizawl Tennis Club President Pu C.Lalbiakzama leh Mizoram Tennis Association President Pu CL Thangliana ten thu an sawi a. Sports Minister leh Mizoram Under 14 champion JH Hruaizela, ATC President Pu Lalbiakzama, Mizoram No.1 hlui Pu SL Sailova ten exhibition match an khel zui a ni.