Sports & Youth Services Minister Pu Zodintluanga chuan vawiin khan Lungleiah State Sports Academy, Lena Stadium, SAI Extension Centre leh Sazaikawna Multipurpose Sports Complex te chu a hmunah tlawh in, hna thawh dan te a enfiah.

Zobawka State Sports Academy sakna tur sum hi Ministry of DoNER atanga sanction niin, kum 2012 khan sak tan a ni a. Value Added Tax (VAT) tihsan avangin hna chawlh lailawk a ni. Kumin January atang khan hna hi thawh chhunzawm leh a ni a. He Academy-ah hian hostel (boys and girls), football, hockey, tennis, volleyball, archery and shooting range te siam tura ruahman a ni. Badminton, table-tennis, basketball leh contact sport khelhna tur Indoor stadium sak mek a ni a. Track and field event nei thei tura ruahman a nih angin artificial turf erawh phah a ni lo vang.  

Minister hian Lunglei Electric Venga SAI Extension Centre chu tlawh lehin, a hmuna Rock Climbing Wall siam zawh chu a enfiah a. Sazaikawna Multipurpose Sports Complex cheng vbch 6 senga sak tur  hnathawh kal mek te enin, a thawktuten kumin chhung ngeia peih hman an in beisei thu an lo hrilh a ni.

Hei bakah hian Serkawn, Melte rama Lena Stadium sak mek, cheng vbch 24.18 senna tur chu tlawh lehin, a thawktute tha tichak tura venpui turin Serkawn mipuite a chah nghal a ni. 

Attachment

  • Loading attachment...