Vawiin chawhma khan Health Minister, Pu Lal Thanzara chuan Aizawl Adventist Hospital (AAH) Paediatric(Naupang) Ward thar, 7th Day tlang ah a hawng.
Pu Lal Thanzara chuan naupangte hriselna hian nghawng thui tak neiin chhungkua, khawtlang leh state economy dinhmun thlengin a khawih tel a ni, a ti a. Ram changkang tehna pakhat chu Infant Mortality Rate(IMR)(nausen kum 1 hnuai lam 1000 zela chhiara thi zat) anih thu leh Mizoram ah nau pianghlim boral an tam thu tarlangin IMR ti hniam tura tan lak a tul thu Minister chuan a sawi a. National Health Mission hnuaia naupang inenkawlna kawngah hmalak mek zel anih thu sawiin, Sick Newborn Care Unit (nausen pianghlim damlo enkawlna bik) pawh khawpui leh district hmun hrang hrangah dah mek zel a ni, a ti a. Tun dinhmunah hian Aizawl hospital hrang hrang ah khum 150 vel naupang tan awmin mipui mamawhna ala phuhruk loh thu leh hetiang dinhmun thlir hian Aizawl Adventist Hospital in naupang tan ward thar an siam hi lawmawm a tih thu Pu Lal Thanzara chuan a sawi a ni.
Aizawl Adventist Hospital-ah hian khum 50 awmin Intensive Care Unit (ICU) leh Neonatal Intensive Care Unit (NICU) changtlung tak a awm a. He ward thar, David’s Children’s Ward ti a vuah ah hian khum 7 awmin cheng nuai 8.7 senga sak a ni.
He hun hi Pu David Lalramchhana, Business Manager AAH chuan kaihruaiin Dr. Dorothy Mary Joshua, Paediatrician AAH cuan report a pe a. Dr. Denyl Avinash Joshua, Paediatrician AAH chuan lawmthu sawina hun a hmang a. Health department hotu te leh hospital hrang hranga doctor te he hawnna inkhawm ah hian an tel a ni.
