Kumin Chapchar Kut lawmna atana inbuatsaihna kal zelah Kut lawmna tur hmun, Aizawl Sipai Lammual chu hnatlang thawka chei leh buatsaih mek a ni a. March ni 1 atangin Kut lawmna hi neih tan turin hemi atan hian Lammual sirah ei leh in tur chi hrang hrang lam theihna tur Foodcourt leh Handloom Exhibition te chu hawn tan a ni ang a. Hemi ni atang vek hian Transport department building thar ah Flower Show neih tan a ni ang a. Vanapa Hall ah Photo Exhibition leh Aizawl Art Gallery, MUP building ah Painting exhibition te pawh hawn nghal a ni dawn bawk a ni. March ni 2 hian Kut lawmna pualin zing dar 6 ah Chanmari leh Sikulpuikawn inkar ah Chapchar Kut Run buatsaih a ni dawn a.Hetah hian YMA branch tin atangin mi 10 zel thawk chhuak tura beisei leh an vaiin mi 1000 tel tura ruahman a ni bawk.