Vawiin chawhnu dar 1:00 pm khan ATI Conference Hall-ah Mizoram State Sanitation Task Force chu UD&PA Secretary Dr. C. Vanlalramsanga kaihhruaina hnuaiah Mizoram state chhunga faina chungchanga hmalakna kal mek ‘Action Plan for Cleanliness Drive’ sawihoin an thukhawm. 

UD&PA Secretary chuan Mizoram chhunga faina beihpui thlak mek hi Mizoram sawrkar hmalakna thar New Economic Development Policy (NEDP) hnuaia Climate Change Mitigation Strategy-a component pawimawh tak a ni tiin, Mizoram hi India rama state fai ber ni tura a inpuahchah nan Action Plan te hi siam a ni a ti. Dr. C. Vanlalramsanga chuan kum 2016-17 budget allocation chu Rs. 25.00 lakhs a ni tih tarlangin, nakum 2017-18 atana budget allocation tam zawk nei thei turin hmalak a nih mek thu a sawi bawk. 

Sawihonaah hian kum 2016-2017 (March – May 2017) chhunga faina chungchanga Mizoram puma hmalak tawhte leh kalpui tur hmachhawpte sawi a ni a. Chung zingah chuan kawr leh lui te thenfai lamah nasa taka tan lak chu Task Force chuan a rel a, hetiang thenfai hna tha taka District hrang hrang a thawh anih theih nan Adventure, Sports leh Youth Clubs te bakah Local Council leh  Village Council te tanrualpui tum a ni. Hemi chungchanga inkaihhruaina mumal tak neih anih theih nan lehkhabu ‘advisory’ buatsaih tum a ni bawk. Hmun ualau laiah te leh school, college leh university campus ah te mitla ngei tur ‘prominent hoarding’ tar te, Swachh Bharat Mission hnuaia Swachhagrahis nena thawhho te, Social Media – Twitter, Instagram leh Facebook hmanga thu thehdarh te, print media centralized a kalpui te, hmun pawimawh lai leh mihring bitna lai hmunah bawlhhlawh bawm dah te, ran talhna hmun chauha ran talh te, tawmngia pawl leh kohhran nena thawhho te sawiho a ni. Nakum (2017-18) chhunga faina chungchanga hmalak dan tur thlirhona neih a ni bawk. 

Mizoram State Sanitation Task Force ah hian Chairman (Secretary, UD&PA) bakah Department hrang hrang atangin member 17 an tel bawk a ni.