Vawiin khan Sports Minister Pu Zodintluanga chuan Mizoram Amateur Taekwondo Association (MATA) buatsaih, 13th Mizoram Official Taekwondo Championship chu Electric Veng YMA Hall ah a hawng.

Hawnna inkhawmah hian Pu Zodintluanga chuan  infiamna kawnga India ram mai bakah khawvel huapa zofate phochhuak tur chuan  kaihhruaina tha tak hnuaia naupangte enkawl a pawimawh a ni a ti a.MATA in Championship a buatsaih chu Catch Them Young Policy hmanga sorkarin naupangte infiammi  hlawhtling ni thei tura a chherna hmanraw pawimawh tak a nih thu a sawi a. Ram pum huap inelna a Taekwondo aiawh a chhuak ten  medal thahnem tak an hawn thei chu fakawm a tih thu sawiin sorkar in tanpuina a pek te chu hmasawn nan tangkai taka  hmang turin a fuih a ni.

He Championship ni li chhung awh turah hian District hrang hrang atangin Taekwondo thiam thahnem tak an kal khawm a. Sub junior, junior leh senior level ah inelna neih a ni anga, Champion of the Champions zawn a ni bawk ang. Tun tum Championship hian pawimawhna bik a nei a,  sub junior, junior leh senior level championship a hrang a neih thin chu tun tumah hian hmun khatah a vawikhatna atan buatsaih a ni a. Category zawng zawngah team aiawh ten inelna neiin hei hian level hrang hrang Championship chu a khaikhawm vek tawh dawn a ni