868/2022-2023
Aizawl, the 10th June 2022 : Vawiin khan Sports Minister Pu Robert Romawia Royte leh Serlui bialtu MLA Pu Lalrinsanga Ralte te chuan Vairengtea Synthetic Football Ground leh Futsal Ground siamna tur hmun an tlawh.

Sports Minister Pu Robert Romawia Royte chuan Chief Minister Pu Zoramthanga leh Serlui bialtu MLA Pu Lalrinsanga Ralte te thahnemngainain Vairengte leh Bilkhawthlir-ah infiamna hmunhma thar Central Sawrkar tanpuinaa kan nei tur hi a lawmawm a, Vairengte Joint YMA-in Football Ground-a Phullem phah an remti chu a finthlak mai ni lovin Vairengte leh a chhehvel hmangaihna vang a ni a ti a. Sports Minister chuan tunlaiin Futsal Ground hi Aizawl leh District Headquarters hmun dangah awmin Futsal a lar thu sawiin Serlui biala Futsal Ground awm thar tur te pawh hi thalai te mamawh chhanna a ni, a ti.

Tourism Minister ni bawk Pu Robert Romawia Royte chuan Serlui B Tuikhuah behchhanin Tourism Circuit pui tham tak Ministry of Tourism sum hmanga siam a nih theih nan DPR siam mek a nih thu a sawi bawk

Bialtu MLA Pu Lalrinsanga Ralte chuan Serlui bial chu ramri depa awm a nih thu sawiin Serlui bial thalaite hian kawng engkim - infiamna a ni emaw, zirna a ni emaw, eng kawngah pawh theihna kan nei a, Aizawl tlanga an tih theih chu kan ti thei ve vek a ni, a ti a. Chief Minister leh Sports Minister hmalaknaa Vairengtea Synthetic Football Ground leh Futsal Ground mai bakah Bilkhawthlir-a Futsal Ground siam a ni thei tur chu lawmawm a tih thu sawiin Ramri dep khuaa awmte ngaihsaktu Sawrkar kan nei hi chhuanawm ka ti takzet a ni a ti bawk.

Sports Minister hi Serlui Bialtu MLA Pu Lalrinsanga Ralte, Senior Sports Promotion Officer, Mizoram State Sports Council Pu R.Lalrinmawia, MPS leh MSSC Engineer ten an tawiawm a ni.