867/2022-2023
Khawzawl 10th. June, 2022 : Khawzawl District Village Council Association General Assembly hmasa ber chu vawiin chhun dar 12:00 khan Khawzawl Vengthar YMA Hall-ah neih a ni a, he hun hi District Bawrhsap Pu C.C. Lalchhuangkima chuan khuallian niin a hmanpui a ni.

District Bawrhsap chuan thu sawiin, Khawzawl District VC Association-in General Assembly hmasa ber an hmang thei chu lawmawm a tih thu a sawi a. VC kalkhawmte chu an khaw tana hma an lakna tura ruahmanna felfai tak siamsa tura chahin ruahmanna an siam dan a zirin Department hrang hrang hotute an dawr ang a, remchan hunah a awm hunah an plan hmang chuan hma an la thei dawn tih a sawi a. Tunhnaiah ruihhlo a pung nasa a, ruihhlo man a tlawm a, a hmaa ti phak lova inngai thalaiten an ti nasa tih te sawi a awm thu sawiin, VC te chu an khua theuhah an dinhmun zirchiang a, ruihhlo lakah an him a nih chuan him reng tum turin a chah a. An him lo a nih chuan hma lak a ngai a ni tiin, hmalak a nih loh chuan hun reilote-ah thalaite hi ruihhlo bawihah an tan a hlauhawm a ni, a ti a. Heroin No.4 ah thalaite an tlukluh laklawh chuan an tho leh thei tawh mai mai lo a ti a, hei hian khawtlang a nghawng a, rei vak lovah phei chuan rukrukin a zui thin a ti a. VC te chu an dinhmun zirchiang tura chahin, khawtlang a dam a, District a him leh zual theihnan VC te chu tangrual turin a chah bawk a. Ruihhlo do chu tanhova, thil tih ngai a ni tiin ruihhlo hian ram leh hnam hnuk a khawih a, thalaite zawng zawng hi ruihhloin a tibuai a nih chuan nakinah chuan hnam boral tur kan ni mai dawn a ni, a ti bawk.

Vawiin Khawzawl District VC Association General Assembly-ah hian rorel inkhawm neih niin hetah hian Khawzawl District huamchhunga VC 38 awmah VC 34 atangin Member te an tel a, Member hi 120 vel an tel thei a ni. Vawiin rorel inkhawmah hian Agenda 5 ngaihtuah a ni.