Vawiin chawhma dar 10.30 khan Mizoram  Weightlifting Association (MWA) buatsaih Catch Them Young leh Referee Clinic chu Archives’ hall, Babu Tlang-ah Sports Minister Pu Zodintluanga chuan a hawng.

Pu Zodintluanga chuan, “Mizote hian sports hi infiamna tiin kan sawi a, chuvang chuan tih tak takna thinlung pu lovin kan infiamin, intihhlimna atan kan hmang thin a. Tunah erawh chuan sports peng engpawh hi eizawnna tling a ni tawh a; chutiang tak chuan kan nula leh tlangvalten eizawnna atan an hmang chho mek tawh a ni” a ti. Rit chawi lamah pawh Mizoten India ram leh khawvel huapah hming kan ziak kai ve tan mek chu lawmawm a tih thu sawiin, “ Mizo naupangte hi a tir atanga kawng mumal tak kan kawhhmuh a, zirtirna belhchiandawl nena kan kaihhruai chuan sang takah kan invawrh chho thei tih hi a takin kan hmu mek a. National Youth Championship te, Junior National Championship te, National Rural PYKKA-ah te kan rit chawi chak naupang te tein medal tam tak an rawn hawn a; kumina 25th North East Games-ah phei chuan a pumpuiah 2-na kan ni hial te hian MWA hruaitute leh infiammite inpekna thukzia a tarlang a ni” Sports Minister chuan a ti bawk.

MWA hian kum 2010 atang khan rit-chawi hi urhsun lehzualin a kalpui a, Bethlehem Veng-ah NIS atanga zir chhuak Coach Zonunsanga Khiangte hovin bul an tan a; tunah hian zirlai 108 zet an nei mek a ni. Bethlehem Veng bakah hian Piarte Tlang-ah zing leh tlaiah ngawrh taka zirtirna kalpui tumin tunah hian Coach 2 ruat an ni. MWA buatsaih Catch Them Young hi a remchan chen chen rawn vil turin India Coach R.K. Malhotra chuan vawiin hian Aizawl a rawn thleng dawn a; amah bakah hian referee-te zirtir a, examination buatsaih nghal turin Indian Weightlifting Federation-a Secretary (Technical) Pu Sunil Lambam pawh a rawn kal dawn a ni.

Sports Minister hian MWA hnenah hian Olympics-a rit-chawina hmanrua an hman ang chiah a lo pe tawh a; hei hi infiammiten an chhawr tangkaizia MWA hruaitute chuan sawiin, “Kum 2010 khan Lalchhandami leh Chhani te chu International Youth Championship-a India aiawh tur thlannaah koh nghal an ni a; kum 2011 Commonwealth Youth Games, South Africa atan khan Lalchhanhima chu koh a ni bawk a. Kan naute chungah beiseina sang tak kan nei a ni” Pu Lalthlamuana Fanai, MWA Gen. Secretary chuan a ti.

Vawiina MWA Catch Them Young hawnna inkhawm hi an pawl President Pu C. Rothianga chuan a kaihruai a; Sports Minister hi Pu Zoliana Royte, Director, S&YS bakah Mizoram State Sports Council hotute leh sports association hrang hrang hruaituten an tawiawm a ni.