Vawiin khan Secretariat Conference Hall, New Secretariat Complex-ah Deputy Commissioner te leh Superintendent of Police te tan dan lova sum khawlna leh a kaihhnawihte khuahkhirhna dan The Mizoram Money Lender &Accredited Loan Providers (Regulation) Act /Rules leh the Mizoram Protection of Interest of Depositors (in financial establishment) Act/ Rules zirhona Chief Secretary Pu Van Hela Pachuau hovin neih a ni.
He workshop-ah hian dan phal loh a sum peipunna chi hrang hrang lo hluar chho zel khuahkhirh a nih theihna tura Mizoram Legislative Assembly in budget session neih zawh taka dan thar a pass tak - the Mizoram Protection of Interest of Depositors (in financial establishment) Amendment Act, 2011 chak taka kenkawh a nih theihna tur sawiho a ni a. He Amendment Act ang hian mipui hnen atanga peipun tur pawisa (deposit) la a sumdawng te chuan anmahni bialtu DC te hnenah an sumdawnna an report ngei tur a ni a. In report lo te chu pawisa chawi leh Jail tan thlenga hrem theih a ni. Mi hnen atanga peipun atana pawisa la a, pawisa dahtute hnena pawisa pe kir duh lo emaw thei lo te chu an bungrua leh ro sum man sak theih a ni a. Dan bawhchhia a mipui atanga pawisa lakhawm (deposit dawng) te chu, mi in complaint an siam kher loh pawhin Police ten an chungah action an la thei dawn a ni.
The Mizoram Money Lender &Accredited Loan Providers (Regulation) Act, 2010 leh budget session neih zawh taka pass he dan siam thatna Amendment Act chak taka kenkawh dan tur workshop-ah hian ngaihtuahho a ni bawk a. He dan hman a lo nih tak avang hian Registering Authority (DC te) hnen atanga phalna (registration) nei lo tan sum puk tira sumdawnna reng reng chhunzawm phal a ni tawh lo va. Mimal emaw company emaw, RBI atanga phalna nei Non Banking Financial Company (NBFC) te pawh ni se, Mizoramah sum puk tir a sumdawn an duh chuan phalna an lak a ngai tawh a. Dan bawhchhia te chu hrem theih an ni. He dan hian a pung (interest) bithliah theih zat te a bituk a, mi harsa ten sum an puk avanga in leh lo an dahkham te dik lo taka an chan lohna turin ruahmanna te a siam a. Sum puktir a sumdawng te chu DC/ Registering Authority te khuahkhirhna hnuaiah an awm tawh dawn a ni.
He workshop-ah hian Chief Secretary Pu Van Hela Pachuau chu khuallian niin Pu Lalmalsawma IAS, Finance Secretary chuan keynote address a sawi a. Principal Secretary Law &Judicial Department, Pu P Chakraborty , Finance Department Additional Secretary Pu Vanlalnghaka leh Finance Department Under Secretary Dr PC Lalawmpuia ten zirtirnan an pe a. Pu Lalthansanga, Finance Secretary chuan lawmthu sawiin workshop hi a khar a ni.
