Vawiin khan Sports & Youth Services Minister Pu Robert Romawia Royte leh Sports Authority of India (SAI) Director General Pu Sandip Pradhan te chuan video conferencing kaltlangin SAI bultuma hmeichhe football chawikanna ni pahfawmin nakuma, India in a thlen tur FIFA Under-17 Women’s World Cup atan India team thlan nan Khelo India Football Girls League Mizorama buatsaih chungchangah meeting an nei a. Meeting ah hian Sports and Youth Services Director Pu Zothanmawia leh a thawhpuite, Mizoram State Sports Council Secretary, Pu C. Laltlanthanga, Sports Authority of India, North East Regional Centre, Imphal a, Director Pu Francis Marwein leh a thawhpuite, Mizoram Football Association (MFA) Honorary Secretary Pu Lalnghinglova Hmar, Aizawl leh Lawngtlai District Football Association hruaitute te bakah I-League CEO Pu Sunando Dhar te an tel a ni.

Sports Minister Pu Robert Romawia Royte chuan SAI bultuma India ram pumah hmeichhe football chawikan nana Hmeichhe Football League khelh tur ruahman chu lawmawm a tih thu leh thil chhinchhiahtlak tak anih thu a sawi a. Mipa football-ah engemaw chen hma kan sawn tawh a tunah hmeichhe football league ruahmanin nasa leh zawkin hmeichhe football a tih hmasawn a rin thu sawiin chutah chuan Mizoram chu a phur hle a, he League a hlawhtling taka buatsaih a nih thei nan theihtawp a chhuah tur thu a sawi lang bawk.

SAI Director General Pu Sandip Pradhan chuan state 16 zingah Mizoram chu Khelo India Football Girls League phurpui hmasa ber leh hemi chungchanga SAI in meeting a neihpui state hmasa ber a ni tiin Mizoram chu league buatsaihtu hmasa ber a nih ngei a rin thu a sawi a ni. Naupangte, a bik takin hmeichhia ten sports an tuipui zui nan te, sports culture chawilar zel nan te leh nakum FIFA Under-17 Women’s World Cup atan India team thlan nan te  Khelo India Football Girls League chu bultan tum a nih thu a tarlang a. League hi AIFF te nen tangduna buatsaih anih dawn avangin State level Football Association te puihna nasa takin an mamawh tur thu pawh a sawi tel bawk a ni.

Meeting ah hian League khelh dan leh buatsaih tum dan ruangam SAI in a duan te chu sawiho niin state level league buatsaih hmain District level league buatsaih Sports Minister in a rawt chu SAI chuan tha tiin hemi atan chipchiar taka ruahmanna siama thehlut turin an ti.

Video Conferencing hnuin he thil a tih tur hmasa leh tul te ngaihtuahin Sports Minister hovin meeting neih zui nghal a ni a. Minister chuan FIFA World Cup lo awm turah India team a Mizo hmeichhia an tel ngei theih nan Deapartment leh MFA chu theihtawp chhuah a tan lak pui turin a sawm. He hun hi remchangah lain Sports Minister chuan SAI Director Pu Marwein chu Kolasib ah SAI Centre ah sports discipline tam thei ang ber dah sak turin leh Lunglei Zobawka Sports Academy tlawh a SAI Centre a dah dan ngaituahpui turin a ngen nghal bawk a ni.

Khelo India Football Girls League hi SAI tanpuina leh AIFF leh a hnuaia football association inziaklut te nen tang hoin state 16 ah buatsaih a ni dawn a, nakum March velah National level League buatsaih tum niin chuta tanga player tha chu India aiawha FIFA Women’s World Cup (under 17) khel turte an ni dawn a ni.

FIFA Women’s World Cup (under 17) hi nakum November ah India in a thleng dawn a, hemi atan hian inbuatsaihna hrang hrang kalpui mek a ni.

Attachment

  • Loading attachment...