3300/2024-2025

Aizawl, the 30^th of November, 2024: Nimin chawhnu khan Pu Lalnghinglova Hmar, Minister of State, Sports & Youth Services Department hovin MINECO-a a office chamber-ah Tuichangral Games 2025 leh Tuipuiral Games 2025 a sports discipline telh belh chungchang sawiho a ni a. Tuichangral Games-ah hian Boxing, Wrestling leh Weightlifting telh belh tur niin, Tuipuiral Games-ah Boxing leh Archery te belh tur a ni.

He meeting-ah hian Sports Minister Pu Lalnghinglova Hmar chuan Mizoram Sawrkar in Olympic 2036-ah Mizo infiammi tam thei ang ber tirh a tum tih a sawi a. Tuipuiral GSA leh Tuichangral GSA te chu kumtin a inkhawmpui (Games) buatsaih thin an nih angin, pilot project atan thlan an ni tih a sawi. Tunhnaiah Mizoramin National leh International level-a intihsiaknaah result duhawm tak tak kan neih thu sawiin kan rilru in National Games mai bakah Asian Games leh Olympic Games thlengin hlawhtlinna a ngaihtuah ngam tur a ni tiin a sawi.

Tuipuiral GSA hnuaiah hian Association 25 awmin, Tuipuiral Annual Sports Meet vawi 52-na hi January 13, 2025 atangin Samthangah neih a ni dawn a. Kumdanga sports discipline an kalpui thin bakah, State Sports Association te nen tangkawpin Boxing leh Archery an telh dawn a ni. Tuichangral GSA hnuaiah hian Association 33 an awm a, March 31 – April 9, 2025 a East Lungdar a Games an neih turah State Sports Association te nen tangkawpin kum 8 leh kum 16 inkar tan Boxing, Wrestling leh Weightlifting te an telh ang. Mizoram Sawrkar chuan heng sports discipline-ah te hian Rs. 1,00,000/- (Cheng nuaikhat) theuhin a pui dawn a ni.

Nimina meeting-ah hian heng sports discipline telh tura inbuatsaih ngai hrang hrangte sawiho nghal a ni a. Sports Association te nen tangkawpin, Sports & Youth Services Department hnuaia coach te bakah senior player te’n training an pe hmasa dawn a ni. Heng training te hi Games tan hmain Tuipuiral leh Tuichangral huamchunga khaw thlanchhuah bikah te kalchilhin an pe thin ang.

Nimina meeting ah hian Sports & Youth Services Department hotute, Mizoram State Sports Council hotute, Archery Association of Mizoram, Mizoram Boxing Association, Mizoram Weightlifting Association leh Mizoram Wrestling Association hruaitute bakah Tuipuiral GSA leh Tuichangral GSA hruaitute an tel a ni.