3299/2024-2025

Aizawl, the 30th November, 2024 : Nizan dar 7 khan Art & Culture Minister Pu C.Lalsawivunga chuan Republic Vengthlang YMA Hall-ah ZORAMBO Comics, Pu B.Lalnunmawia, Republic Vengthlang ziah chu a tlangzarh.

Art & Culture Minister Pu C.Lalsawivunga chuan talent nei tha tak Pu B.Mawia'n ram leh hnam a veina milem hmanga Mizoram mipui hriat leh chhiar theiha a duang chhuak chu lawmawm a tih thu sawiin, Mizo mipui te'n an ṭangkaipui bakah Mizo hnam chhanchhuahna kawnga lehkhabu tangkai tak a nih ngei a beisei thu a sawi a. Kan ramah chanchintha a lo luh atangin hmuh theiha hmasawnna a thlen thu leh khawvel changkang zelin kan ramah pawh changkanna a rawn kenluh tel thu sawiin, "Politics-ahte, zirna leh tunlai thiamnaahte hma kan sawn nasa em em a, tun dinhmun kan chuankai theih dante leh Arts lama hma kan sawn dante chu he comic bu tlangzarh takah hian ngaihnawm takin a rawn inpho chhuak ta a ni“, a ti bawk.

Comic ziaktu Pu B.Lalnunmawia chuan kum 24 zet a Comic ziah a lo vahvaihpui tawh hnuah tuna hlawhtlinna a hmuh thu a sawi a. Ram leh hnam humhalh a vei thu leh Mizo mipuite hnena milembu hmanga ziah a tul thu leh chu mi tipuitling thei tura theihtawpa a buatsaih a lo hlawhtling tak avangin lawmthu a sawi bawk.

Lehkhabu tlangzarh inkhawm hi Branch YMA President Pu Israela'n a kaihruai a. Pu K. Lalhlimpuia'n ZORAMBO Comics thlirlawkna a nei bawk.