2837/2024-2025

Aizawl, the 5^th of November, 2024: Vawiin chawhma dar 10:00 khan Pu Lalnghinglova Hmar, Minister of State, Sports & Youth Services chuan MINECO-a a office-ah October thla-a Asian Arm Wrestling International Cup a Mizo infiammi medal lo hawnte lawmpuina hun a buatsaih a. He hunah hian medal late bakah Sports & Youth Services Department hotute, People's Armwrestling Federation of India leh Mizoram Arm Wrestling Association hruaitute an tel a ni.  

Mumbai a October 19 atanga 26 chhunga inelna neihah hian Mizoram atangin Denic Lalruattluanga chuan Senior Men kg 80 huangah gold medal a la a. Benjamin Lalawmpuia'n Senior Men kg 100 huangah silver medal la in, Vanramnghaki chuan kg 80 hmeichhe huanga, ding leh vei lam inelhah silver medal ve ve la in, Para Women-ah bronze a la bawk a ni. Minister chuan lawmpuina hunah hian, "Tunhnaiah mipuiin kan thalaite hlawhtlinna kan lawmpui dan leh, social media kaltlanga kan inchawimawi zui zel dante a lawmawm ka ti tak zet" tiin a sawi. 

Sports Minister Pu Lalnghinglova Hmar chuan infiammite tan Sports Incentive Cash Award kalpui dan chu siamthat a nih tur thu a sawi a. Olympic huanga infiamna chauh ni lovin, Olympic sports discipline ni lote pawh telh an nih tawh tur thu a sawi. "Kum li danah Olympic huanga infiamna telh thinte hi tihdanglam a ni ve thin a, hei vang hian Olympic sports discipline nghet a awm theih loh avangin Mizoram State Sports Council in association 33 a enkawl mekte pek vek theih dan hi sorkar chuan a ngaihtuah ta a ni." a ti. Incentive pek dan tur hi sawifiahin, "Olympic discipline ten sorkar atanga incentive an dawn ang za a sawmnga (50%) zel Olympic discipline ni lote hian an dawng ve dawn." a ti. 

Infiammite lawmpuina leh an hamthatna ngaihtuah chungchangah Sports Minister chuan sawi belhin, "A tir atangin MAWA bakah infiammite nen kan inbe pawp reng a, mipui lamin thawm lian tak nena han rik hluai kan beisei nghal deuh. Mahse sorkar kalphung anga kal chuan thil tih nghal zung zung theih a ni lova, kalphung leh danin a phal angte zirchian niin ngaihtuahna kan seng zel a ni. Hna nghet chungchangte pawh an hlawhtlinna neih san zawng in a phak dan ang zelin zirchianna kalpui tan a ni tawh." tiin a sawi bawk. 

Pu Lalnghinglova Hmar chuan Mizoram in kum tawpah international level arm wrestling inelna a thlen tur thu a puang tel bawk. Kumin December thlaah Aizawl, Mizoram ah ngei Pro Panja Mega Match Mizoram tih inelna neih a ni dawn a, hetah hian khawvel huap arm wrestler tha te lo kalin, Mizo arm wrestler te nen an inhmachhawn tur thu a puang. Gold medalist Denic Lalruattluanga pawh inlan dawnin world level a arm wrestler tha a hmachhawn tur Pro Panja lamin an chahlut dawn a ni.  

He hunah hian India rama arm wrestling league lian Pro Panja League neitu Parvin Dabas leh PAFI president Preeti Jhangiani te an tel bawk a. PPL hotupa Parvin Dabas chuan, "Kan infiammite, Denic-a leh a thiante mipuiin an lo lawm dan leh milar an nih tawh dan ka hmuh hian ka lawm a, arm wrestling in hma a sawnzia ka hmu. Arm wrestling hi combat sport taksa tana him si a ni a, Pro Panja League pawh hi tunah India rama infiamna league hmasawn chak ber zing ami niin entu maktaduai 32 chuang kan nei thei a. Khawvel huap a arm wrestler thate bakah official-te thleng pawhin a tha ber zel an rawn tel duhna leh an ngaihven a ni a, kan thawhpui Sony lam pawhin an beisei kan khum avangin min lawmpui hle." tiin arm wrestling in India ramah hma a sawn dan leh Mizote chu hmabak eng tak nei an nih thu a sawi. Tin, Mizoram sorkar in People’s Armwrestling Federation of India a lo dawnsawn dan leh hmalam huna an thawhdun zel theihna tur kawngahte a lawm thu a sawi bawk. 

Vawiin programme-ah hian Pu Philip Lalbiakchama, General Secretary, Mizoram Arm Wrestling Association chuan report pe in, medal late’n thu tawi an sawi theuh bawk a ni.