2308/2026-2027 

Aizawl, the 22^nd September, 2026 : Muaythai Association of Mizoram (MAM) buatsaih North East Regional Muaythai Championship 2026 hawnna inkhawm chu vawiin khan R. Dengthuama Hall, Salem Veng Mualpui, Aizawl-ah neih a ni a, Sports & Youth Services Minister Pu Lalnghinglova Hmar chuan khuallian niin a hawng.

Thu sawiin Sports Minister chuan, Muaythai chu tunlai Sports discipline thang chak berte zing ami a nih thu a sawi a; nakuma national games thlengtu tur state Meghalaya Chief Minister chu Muaythai Association of India President a nih thu sawiin, hetah hian Muaythai pawh telh a nih theih nan an nawr hlawhtlin chuan Muaythai dinhmun chawisana a awm tur thu a sawi a; kum 28 ralta 1998 - Olympics Thailand-a neihah Mizoramin Muaiythai demonstration an lo nei tawh thu te, tun hnai 2025 Asian Youth games neihah pawh Muaythai chu telh a nih tak thute sawiin, hengte hi Muaythai-in ngaihhlut a hlawh telh telh tawh tih lantirtu an ni a ti a; sports association leh federation te leh kan sawi thin International Olympic Association chuan eng tik niah emaw chuan Muaythai hi Olympic-ah an la telh ve ang tih hi, he huna kakhawm tena kan suangtuah leh kan thlir mek a ni a ti bawk. He NE Region inelna hian, Mizoram-a Muaythai infiamna tihhmasawn kawngah hmasawnna lian tak a thlen ngei a beisei thu sawiin, he inelna hi hlawhtling taka neih a nih theih nan, participant-te chu theihtawp chhuaha bei zel tuin a fuih a, duhsakna a hlan bawk.

He inelna hi September ni 24 thleng awh tur niin North East State hrang hrang atangin Muaythai fighter mipa leh hmeichhia thahnem tak an tel a. A hawnna inkhawmah hian Muaythai Association of Mizoram General Secretary Pu Vanlalawmpuia'n inlawmna thu sawiin, President Pu Johny Ngurthansanga'n thu a sawi bawk a; Muaythai Association of Meghalaya ten Muaythai demonstration an nei bawk.

Mizoram hian Kum 2010 khan 11th National Muaythai Championship lo thleng tawhin Team Champion an lo ni tawh a. World Championship-ah Gold Medal 2, Silver 4, Bronze 6 leh Asian Championship-ah Gold 2, Silver 2, Bronze 2 la tawh bawkin, International Referee & Judge 3 an nei mek bawk a ni.