No.917/2021-2022

Aizawl 11th June 2021: Vawiin chhun khan Government Aizawl College-a Eco Club leh NSS Unit te tangkawp huaihawtin Mualpuia an college hmun (campus) tharah Green Mizoram Day pualin thing phun a ni a. Sports & Youth Services Minister Pu Robert Romawia Royte chu he programme-ah hian khuallian a ni.

Pu Robert Romawia Royte chuan thing leh nungcha dangte chu mihring nena inzawm tlat kan nih avangin an pawimawhzia kan hriat a ngai, a ti a. Kum rei vaklo kaltaa thal lai pawha kang chat ngai lo tuihna tha tak tak awm thin te chu ngaw kan thiah nasat avangin a tlem tial tial a, thing leh mau kan neih mek humhalh leh a thar phun belh zel hi kan damkhawchhuahna tur a nih hriaa kan harh thar a pawimawh a ni, a ti. Thing tiak phun a pawimawh tluk zetin a enkawl chhunzawm a pawimawh tih sawiin Minister chuan kan thing tiak phun te a nung em tih ngaihvena, enkawl zui a, a riral loh nana kan humhalh a tul a ni, a ti bawk.

Pu Robert Romawia Royte chuan thingphun programme buatsaihtu NSS leh Eco Club hnenah lawmthu a sawi a. Khawtlang tana thil tha - faina kawngah te, thisen pek kawngah leh social work danga hma hruaitu NSS volunteer leh Program Officer te chungah lawmthu a sawi a. GAC Eco Club pawh nung taka thang zel tur leh zirlaite thinlungah thing leh nungcha humhalh tulzia tuh nghet tlat a, tan la chhunzawm zel turin a chah bawk a ni.

Prof. C. Sangluaii, Principal, Govt. Aizawl College in thingphun hmaa inkhawm tawi buatsaih hi a kaihruai.

Vawiin hian thing tiak chi hrang hrang 50 chuang vel zet Government Aizawl College campus tharah hian phun a ni a. Sports Director Pu Lalsangliana, GAC Principal Pi C.Sangluaii leh College zirtirtute bakah Eco Club member-te leh NSS volunteer-ten thing tiakte hi an phun a ni.

Govt. Aizawl College-a Eco Club-te hian kumin June 5, World Environment Day-ah khan Sikulpui/Sikulsen hotute leh Mission Veng Cheitu Pawlte nen tang hovin Sikulpuikawnah thing engemawzat an lo phun tawh bawk.