No.918/2021-2022
Dated Champhai, the 11th June, 2021: Mizoram hmun dangte rualin vawiin khan Champhaiah District Level Committee on Green Mizoram huaihawtin 'Tuihna leh boruak tha siam nan thing i phun ang u’, tih thupui thlan hmangin Green Mizoram Day vawi 23-na hman a ni. Green Mizoram Day thingphun hnatlang hi Bawrhsap Pi Maria C.T Zuali, Chairman, District Level Committee on Green Mizoram hova neih a ni.
Pi Maria C.T Zuali chuan nitin khawsak kawngah thing leh mau kan hman nasat thu sawiin, nitin mamawh ni mahse kan hman tlem telh telh a tul a, loh theih loh a nih loh chuan hman ni lo se a duhawm hle a ni, a ti. Thing puitling ni turin hun a mamawha, tuna phun hi nakin lawka kan tu leh fate tan a ni tih kan hre reng tur a ni, a ti a. Thing tiak phun mai duh tawk lovin enkawl leh cheibawl kawngah tan kan lak chhunzawm zel a ngai dawn a ni, a ti bawk. Thingphun hnatlangte chu a puitling thlenga enkawl chhunzawm turin a chah a ni.
Green Mizoram Day hawnna program DHO Office Complex, New Champhaia hman kaihhruaitu DFO Champhai & Member Secretary, District Level Committee on Green Mizoram Pu Lalduhthlana chuan Green Mizoram Day hman tan kum 1999 atanga nikum thlengin Mizoramah thing tiak 16,61,720 phun tawh niin, 23,20,189 sem chhuah tawh a ni, a ti a. Champhai Forest Division bikah chuan 1999 atanga 2020 chhungin thing tiak phun leh sem chhuah zat chu 64,247 a nih thu sawiin, nikum Green Mizoram Day-ah thing tiak 240 phun a nih thu leh, a tiak 2,088 sem chhuah a nih thu a sawi bawk.
Nimin thlengin VC, NGO leh sawrkar department-ah te thing tiak 2,404 sem
chhuah a ni a, mimal, VC, pawl leh sawrkar department mamawhte hnenah pek chhuah zel tum a ni, a ti a. Thing puitling mekte dimdawi a tul thu sawiin, thing phun tam bansan chuang lo a, a puitlin ngei theih
nana tha thlah lo a tanlak a tul thu a sawi a.
Green Mizoram programme kaltlanga kan ram ti hring mawi leh tur chuan kan
thinlung a hring mawi hmasak a ngaih thu tarlangin, theihtawp chhuaha thawhhopuiah district mipuite a sawm a ni.
He hunah hian kangmei ven kawnga hma la tha khua leh chanchinbute hnenah Bawrhsap-in lawmman a hlan a. Kangmei veng tha khuate chu a indawt danin Lungphunlian, Tualcheng leh Vaphai te an ni a. Chanchinbu hma la tha berah Pasaltha, chu thlan a ni a, Lenrual pahnihna niin, Rihlipui chu pathumna a ni. Pu F.Lalnunhlima, RO Champhaiin thingphun hnatlang neih dan turte a sawifiah hnuah, Pu P. Lahmingliana, Principal, Govt Champhai College-in lawmthu sawina neiin hawnna hun hi a khar a. Hawnna inkhawm zawhah hian hmun 6 ah inthendarhin mahni thing phunna tur hmun theuhah thingphun hnatlang neih chhunzawm nghal a ni. New Champhai-Zotlang road-ah Champhai Nature Conservancy, New Champhai-Zokhawthar Road Ruantlang VC area chinah Ruantlang Branch YMA, New Champhai-Zokhawthar Road Mualkawi VC area chinah District Level Committee on Green Mizoram member-te leh an thawhpuite bakah Sawrkar hnathawk hnatlang dangte, New Champhai-Zokhawthar Road Melbuk VC Area chinah Melbuk Branch YMA, Hringlang tlang District Park-ah District Park Committee member-te leh Mualkawi Branch YMA te, Mualbuhvumah Sub-Hqrs. YMA te an hnatlang a ni.
Vawiin Green Mizoram Day pual hun hmanah hian District Level Committee on Green Mizoram member-te leh an thawhpuite, YMA, Champhai Nature Conservancy (CNC) leh Chanchinbumite an tel a, hnatlang a chhuak hi mi 387 an tling a ni.
Green Mizoram Day 2021 pual hian thing tiak chi 13; Boottle brush, Lamkhuang, Tlaizawng, Thuza, Herhse, Chawmzil, Khuangthli, April parsen, Sasua, Ngiau, Char, Ngaingaw leh Zawngtahte semchhuaha phun a ni.
Attachment
- Loading attachment...
