No.1917/2021-2022

Aizawl the 18th August, 2021 : Vawiin khan Sports Minister Pu Robert Romawia Royte, Mizoram State Sports Council President ni bawk, hovin Aijal Club-ah Mizoram State Sports Council ten General Body meeting an nei a. Olympian Lalremsiami lo hmuah dan tur leh thildangte an rel.

MSSC President Pu Robert Romawia Royte chuan Olympic Games-a India leh Mizoram tihmingthatu Lalremsiami anga Olympic-a Mizo ten dinhmun 4-na an la hauh pha ngai lova, chuvangin a chungah Mizoram sorkar a lawm tak meuh meuh a, Chief Minister-in a lo tiam tawh angin, Mizoram sorkar chuan sorkar hna ?ha tak a pe dawn a ni a ti.

India aiawha hmeichhe hockey player Lalremsiami chu August 25, 2021 khian Lengpui Airport-ah a lo tum dawn a. Amah lawmna leh chawimawina neih dan turte Mizoram State Sports Council General Body meeting chuan MSSC Vice-President Pu V. Lalzawmliana, Chairman-na hnuaiah Committee a siam nghal a ni.

Minister Pu Robert Romawia chuan tunah Mizoram sorkara Sports Department chuan cheng nuai sing 2 velin hma a la mek a; Sports tihchangtlun nan state sum ringawt hmang lovin 'Khelo India' leh thildang atangin sum hmuh a ni a ti. Pu Robert Romawia chuan Olympic atan hmathlir tha tak neih a tul a, chumi tihlawhtling tur chuan India sorkar a inhawng em em a ni tiin Mizoram pawh Sports Industry a nei ta hi a vanneihthlak hle a ni a ti bawk.

MSSC General Body meeting hian Annual Programme 2021-2022 leh Annual Report 2020-2021 te sawihovin an pawm a ni.