No.5840/2020-2021

Dated Aizawl, the 7th October, 2020 : Vawiin chawhma dar 11:00 khan Sports & Youth Services Minister Pu Robert Romawia Royte chuan a pisaah Hockey Mizoram Website thar a hawng.

Sports Minister Pu Robert Romawia Royte chuan khawvel hriata Mizote min pholangtu pawimawh tak chu hockey hi a ni a, hockey mellung pawimawh tak Hockey Mizoram Website hmanga phun a ni hi a lawmawm takzet a ni a ti.

Pu Robert Romawia Royte chuan Pu Zoramthanga kaihhruai sorkarin thalaite hmakhawthlir thui tak neiin, kawng hrang hrangin hma a la chho mek a. Tunah hian Aizawl District Muallungthu-ah leh Lungeiah Hockey field phullem phah turin Central sorkarin sum Rs. 1600 lakh zet a sanction a, hockey hmanga infiamna hi chawilara tihvul zel kan tum a ni a ti. Minister chuan Sport Policy leh Sport Industry dinhmuna hlankai hlawkna kan tel mek a ni a ti.

Hockey India-in kum 2019 atang tawh khan a hnuaia Affiliated Unit Member te Website nei vek turin ti mah se, Hockey Mizoram chuan sum harsatna avangin a tihlawhtling thei lo a. Harsatna tam tak paltlangin tunah hian Hockey player te hmakhua thui tak thlirin Hockey India duh ang chu a lo tipuitling thei ta a. Lailen Consultancy Pvt. Ltd, Tuikhuahtlang nen MoU ziakin Website thar - http//hockeymizoram.org chu Hockey India leh hockey infiamna ngaisang leh tui mite hman theih turin Website thar siam a lo ni ta a ni.

Hockey India hnuaiah hian Affiliated Member chi hrang pali (4) an awm a, Permanent member 29, Associated member 28, Academic member 33 leh Hockey member 2 an awm a, Hockey Mizoram chu Permanent member 29 zinga pakhat a ni.

Tunah hian India Womens Senior Team-ah Lalremsiami, Kolasib College Veng a tel mek bakah, Indian Women Junior Team-ah Mizo nula pathum - Marina Lalramnghaki (defender) Kawnpui, F.Ramenmawii, (goalkeeper) Lunglei leh Lalrindiki (forward) Hnahthial te an tel mek a ni. Anni bakah hian kum 2017-a SAI Centre, Bengaluru-a training lo nei tawh Tv. F.Zoremsanga, Hnahthial chu training zawm leh tura hmalak mek a ni.