No.3737/2020-2021

Vawiin ni 3/8/2020 khan Pu R.Laldanglova, Armed Vengin a ziak lehkhabu pahnih 'Phu Loh Di' tih leh 'Ka Lung Dumtu' tih chu Aizawl East-II bialtu MLA leh Minister Pu Robert Romawia Royte-in Armed Veng-ah a tlangzarh.

He tlangzarh inkhawm kaihruaitu Art & Culture Minister Pu R.Lalzirliana chuan a u R.Laldanglova'n Stroke avanga harsatna khirh tak tawk chunga Lehkhabu pahnih a ziak chu lawmawm a tih thusawiin, sawm bikte lawmna thu a sawi.

Lehkhabu tlangzarhtu Minister Pu Robert Romawia Royte chuan Lehkhabu 2 ziaktu Pu R.Laldanglova'n natna khirh tak tuar chunga tumruh leh tuarchhel taka a thiltum a hlen leh ta chu ropui a tih thu a sawi a. Mizote'n lehkhabu leh chanchinbu chhiar uar a tul thu sawiin, hriatna dik leh nghet neih nan lehkhabu chhiar a pawimawh thu a sawi a, Lehkhabu ziaktute hlutzia hriat thar zel a pawimawh a ni a ti. Minister chuan a bial chhung mi chhuanawm, lehkhabu tam tak lo ziaka lo letling tawhtu Pu Danglova chu fakawm a tih thu sawiin, tunhmaa a lehlin 'Sudden' tih phei chu a naupan laia a chhiar ve thin a ni a, a lar thei hle a ni a ti. He hun kaihhruaitu Minister Pu R.Lalzirliana leh a u Pu R.Laldanglova birthday inrual chu a lawmpui thu a sawi bawk a, he ni taka lehkhabu pahnih tlangzarh chu a inhmeh hle a ni a ti.

Lehkhabu ziaktu Pu R.Laldanglova pawhin thusawiin sawm bikte chungah lawmthu a sawi a, khum atangin Lehkhabu dang a ziak leh mek tih a sawi. Lehkhabu pahnih te hi Rs 100/- man ve ve a ni a, Bazar-ah lei turin a awm dawn a ni.