1810/2023-2024

Aizawl, the 8th September, 2023: Mizoram Civil Services Sports & Cultural Association (MCSS&CA) buatsaih 34th Mizoram Civil Services Association Annual Sports Meet, 2023-2024 (Phase-I), September ni 5-8, 2023 chhunga neih kharna hun Ramhlun Indoor Stadium Conference Hall-a neih chu Sports & Youth Services Minister Pu Robert Romawia Royte chuan khuallian niin vawiin chawhnu dar 3 khan khuallian niin a hmanpui.

Khuallian Sports & Youth Services Minister Pu Robert Romawia Royte chuan Sawrkar hnathawk Department hrang hrang atanga Mizoram Civil Services Annual Sports Meet hmangtute chibai bukin, kum tina hman thin Civil Services Sports Meet chuan rah tha a chhuah ngei a beisei thu a sawi a. Hlawhtlinna changte a lawmpui rualin he hun tihlawhtlingtu zawng zawngte inpekna fakawm tiin, Civil Services Sports Meet chu tun aia hlut zual deuh deuha chhawmnun zel a tul thu a sawi a. Infiamna leh taksa sawizawi chu nitin nunphunga beh tir a pawimawh thu sawiin, sports hmangin dam lohna awm theite hneh i tum ang u, tiin kalkhawmte a sawm a. Mizoram Sawrkar-in Sports Policy tha tak a duan chhuah thu leh Sports chu industry chhawrnahawm tak a nih tawh thu a sawi bawk.

Sports Minister chuan tunhnaia Sports & Youth Services hmasawnna leh hlawhtlinna chan hrang hrangte tarlangin, hripui leng karah pawh infiammite'n theihtawp an chhuah a, North East level mai nilo, National level thleng pawhin tualzawla intihsiakna anga ngaia hlawhtlinna an chang thin chu chhuanawm a tih thu a sawi a. Budget tlemte nei chungin Sports Department kaltlangin Sawrkar laipui scheme hrangte leh CSR kaltlangin cheng nuai 53,000 chuang hai chhuah a nih thu leh, a department chan pathum Sports & Youth Services, Tourism leh ICT hmalakna hnuaia GST leh Labour Cess atangin Mizoram Sawrkar sum bawmah chhiah nuai sing chuang chhunglut thei tura rin a nih thu a sawi a. Mizoramah Sports a thang chak hle a ni, a ti bawk.

Covid-19 avangin kum 2 chhung Annual Plan chhunga dah thlap tawh, sum hmuh tur anga ngaih hloh tak cheng vaibelchhe 2,600 chuang a awm laiin Covid-19 avanga sum hmuh chu cheng vaibelchhe 70 chuang hret a nih thung thu a sawi a. Hemi avanga harsatna hrang hrang tawh karah Sawrkar chuan theihtawp chhuahin mipui rawngbawl hna leh hmasawnna ruhrel siam hna a thawh zel thu a sawi a. Hlawh leh hamthatna chungchangah lungawilohna nei mah se, Sawrkar hnathawkte'n Sawrkar dinhmun hriaa rilru zau tak an pu chu lawmawm a tih thu a sawi a. Sawrkar kutke pawimawh tak leh hlawhtlinna hrang hrang phena mi tangkai tak an nih thu sawiin, ram leh hnam hmasawn nana thahnemngai taka thawk zel turin a chah a ni.

Mizoram Civil Services Annual Sports Meet kharna hun hi Pu Lalnunhlua, President, Mizoram Civil Services Sports & Cultural Association (MCSS&CA) chuan kaihruaiin Pu Rosangliana, Gen. Secretary, MCSS&CA hnen atangin report ngaihthlak a ni.

Mizoram Civil Services Sports Meet 2023-2024 ah hian a pumpuiah PHED & SIPMIU chu pakhatna niin, Gold 6, Silver 4, Bronze 5, a vaiin Medal 15 an dawng a. Police (Un Armed) chu pahnihna niin, Gold 5, Silver 5 leh Bronze 4, a vaiin Medal 14 an dawng a. Pathumna Police (Armed) chuan Gold 4, Silver 5 leh Bronze 6, a vaiin Medal 15 an dawng a ni. Discipline tinah Department 50-60 dawn an tel zel anga chhut a ni.

Sports Discipline hrang hranga pakhatna dinhmun hauhtute chu Badminton-ah Police (Armed), Table Tennis-ah SALT, Chinese Checker-ah P&E, Carrom-ah EF&CC leh Chess-ah H&FW Department-te an ni.

MCSS&CA Annual Sports Meet 2023-2024 hun hniha then niin thawh khatna (Phase-I), Sports Meet, September ni 5-8, 2023 chhunga neih kaltlang hian Sports discipline 5; Chess, Chinese Checker, Badminton, Carrom leh Table Tennis hmangtein intihsiakna neih a ni a. Ruahman dan chuan a thawh hnihna (Phase-2), Cultural Meet inelna chu nakum February ni 14-16, 2024 chhungin neih tum a ni.