No.6037/2020-2021

Sports & Youth Services, Tourism leh ICT Department-te changtu Minister of State Pu Robert Romawia Royte chuan vawiin khan Lunglei rawn thlengin a Department chan hnuaia hmasawnna hna kal mekte a hmunah kalian enfiah a, hmalak zel dan tur official-te leh khawtlang hruaitute ruahmanna a siam pui.

Minister of State Pu Robert Romawia Royte ho hian vawiin khan Lunglei Circuit House Coference Hall-ah Press Meet neih nghal a ni a. A Department chan hnuaia Lunglei District chhunga hmasawnna ruhrel ruahman mek leh hmachhawpte Press Meet ah hian a tarlang a ni:

1. 2 Mizo Battalion NCC thar din :
Mizoram Sorkar Council of Minister chuan ni 12.2.2019 khan Lunglei khawpuia 2 Mizo Battalion NCC thar din a remti a, Sazaikawnah Battalion Headquarters hawn a ni ang. A rang thei ang bera function-tir tum a ni.

2. Lunglei District Sports Complex :
Mizoram Sports Policy 2019-in a lo tarlan angin Lunglei khawpuiah District Sports Complex din tum a ni a, Rs. 4919.31 Lakh approval hmuh tawh a ni a, sum sanction beisei mek a ni.
He complex hian Football Ground, Athletic Ground, Indoor Halls, Gymnasium, Futsal Ground, Basketball Court, Volleyball Court, Music Centre, Office, etc, a keng tel ang.

3. Zobawk Residential Sports School:
Mizoram State Sports Academy Zobawkah din a ni ang a, Academic Buildings, Hostel Buldings, Astro turf, Football Ground, Basketball Court, Gymnasium, Volleyball Court, etc. a awm ang a, zirna tha taka kalpui chungin Sports thiamte dah khawm an ni ang. He Academy atan hian Rs. 3430.90 lakhs sanction tawh a ni a, 50% dawn tawh a ni.

4. Astro Turf Hockey Ground:
MSSC Compound Salem Vengah Rs 1108.70 lakh senga din tur a ni a. Approval Minute a chhuak tawh a, sanction thuai beisei a ni.

5. Electric Veng Astro Turf Football Ground:
Electric Veng field chei thain Phullem phah tum a ni a, Rs 812.98 lakh chu Approval Minute dawn tawh a ni.

6. Standard Futsal Grounds Pahnih din dawn:
Lunglei khawpui hmun hnihah Futsal Grounds pahnih din tum a ni a, Ramthar Veng leh Venghlun te kan en dawn a ni. He project atan hian Rs 637.31 lakh Approval Minutes dawn tawh a ni bawk.

Heng te bakah hian Volleyball Court leh Basketball Court hmun remchang laiah engemaw zat siam tum a ni bawk.

7. Zotlang Tourist Lodge, Lunglei tihchangtlunna turin Project siama thehluh a ni a. Sum sanction la hmuh a ni lo a, hmuh ngei erawh beisei a ni.

8. Council of Minister chuan October 1, 2020 khan ‘The Mizoram Telecom Infrastructure Policy, 2020’ a pawm angin Lunglei District leh Mizoram hmun hrang hrangah I&CT hmalakna tihchangtlun tuma hmalak mek a ni.

Sports Minister chuan heng hmasawnna ruhrel te hi Bialtu Minister/MLA te nen uluk taka inrawn chunga tanghova ruahman thin anih thu sawiin thalai leh infiammiten an hman tangkai ngei a beisei thu a sawi a. Mipuite hman tangkai theih tura peih thuai an nih theihnan theihtawp chhuah chhunzawm zel a tum thu Sports Minister chuan a sawi a ni.

Minister-hi Aizawl atangin Er H.Lalzirliana, MLA & Vice Chairman, Road & Infrastructure Development Board, SYS Director Pu Lalsangliana, Pu Lalfamkima, Engineer, MSSC leh party hruaituten an rawn tawiawm a. Lungleiah HPC Vice Chairman Pu Lawmawm Tochhawng, Dr K.Pachhunga, MLA & Vice Chairman, Bamboo Development Board,official-te leh party hruaitu mi thahnem takin anlo hmuak a ni.

Minister leh amah zuitute hian vawiin khan Lunglei an rawn panna lamah Thenzawla Tourism Department hmalakna Auditorium leh Wellness Spa-te an rawn tlawh phei bawk a ni.

Naktukah Serkawn VC leh NGO-te nen inkawmhona hun an hmang chhunzawm anga, Zotlang Tourist Lodge a tlawh bawk ang.