No.6036/2020-2021

Aizawl, the 13th October 2020 : Vawiin khan Environment, Forest & Climate Change Minister Pu T. J. Lalnuntluanga’n Pachhunga University College-in Wildlife Week hmanna Seminar Hall, PUC Campus ah an buatsaih chu khuallian niin a hmanpui.

Pu T. J. Lalnuntluanga chuan Mizorama college tha ber leh hmunhma nei tha ber, Pachhunga University College-in Wildlife Week hman nachang an hria chu lawmawm tiin hei hian ramngaw leh nungcha humhalh an ngaihpawimawh zia a tilang chiang hle niin a sawi. Aizawl mipui, abik takin PUC Campus chheh vel a awm veng leh mipui ten Aizawl khawpui tan PUC-a ram ngaw, thing leh mau leh nungcha te an hlut zia an hriat thar leh hengte hian Aizawl khawpui tan boruak tha an siam nasat zia te an hriat nawn a pawimawh hle tih a sawi a. Helai ram leh Forest Training School ram chhunga ramngaw tha chu Aizawl khawpui boruak vawngtu leh siamthatu an nih tih hre reng chungin a tichereu leh a daidarh zawnga engmah ti lo tura chahin college thuneitute chu a humhalhna kawngah pui thin turin a chah a. Chutih rualin college lam te pawhin hetiang zawnga zirtirna leh awareness ang te ngaipawimawh a, tan an lak thar a pawimawh tih a sawi lang bawk a ni.

Tunlai khawvel sik leh sa inthlak danglam nasat avangin boruak ti tha turin thingphun uar chhoh zel mitinin kan hriat thar a pawimawh tiin Minister chuan Aizawl leh a chhehvelah sava in an tlan duh thing rah chi phun uar a tul thu a sawi. PUC leh Forest Training School rama Nagar Van Scheme (City Forest scheme) kalpui turin ngaihtuahna hman mek anih thu te leh Aizawl sahuan tihchangtlunna tur te pawh kalpui turin Department in ruahmanna a nei mek tih te a sawi lang bawk a ni.

PUC Principal Dr. Tawnenga chuan 1995 khan thing phunna kawnga hma an lak that avangin Indira Priyadarshini Vrikshamitra chawimawi an dawn thu te sawi langin PUC ram chu Aizawl khawpui tan rohlu a ni a ti a. A humhalh kawngah theihtawp chhuaha tan an lak dante a sawi tel a. Dr. Lalruatsanga, Associate Prof., Dept. Of Botany leh Pi Z.D. Lalremthangi Assistant PUC te pawhin helai ram an College in an cheibawl leh an enkawl dante an sawi bawk a ni.

Minister hi Pu Liandawla, Principal Secretary leh PCCF ni bawk leh Environment, Forest & Climate Change Department senior officials ten an tawiawm a. Programme zawhah Minister leh amah tawiawm tuten PUC Campus ramngaw leh hmun hma an fang a ni.