No.3391/2021-2022
Aizawl, the 14th December 2021 : Vawiin khan Sports & Youth Services Minister Pu Robert Romawia Royte'n Keifang khua kum 100 tlin lawmna chikhat - Centenary Infiamna Kutpui, Centenary Organzing Committee in an buatsaih chu khuallian niin a kharna program Keifang Field ah a hmanpui a. Aizawl Mayor Pu Lalrinenga Sailo pawhin he hun hi khualzahawm niin a hmanpui a ni.

Sports Minister Pu Robert Romawia Royte chuan Keifang khua mite chu Centenary duhsakna hlanin Keifang khua chu Khawchhak panna pengthuam pawimawh tak niin khaw thang tak nia a hmuh thu a sawi a. Mizo te hi kan la tlem em a chuvangin pen pun aiin piang pun lamah tan kan lak a tha a, fa nghah kan in zirtir zel hi a pawimawh a ni, a ti. Saitual District hmasawnna atan Sawrkar in a thei ang angin hma a lak mek thu sawiin Sports Minister chuan a Department 3 chan atanga Saitual tana hmasawnna hna thawh tawh leh thawh mekte a sawi lang a. Heng zinga hian Keifang Field a phul lem phah te, Saitual a Athletics tih theihna field siam tum te, Tam Dil cheibawl tum dante chu a tarlang a. Keifang Field sira Sangtea Basketball leh Volleyball Court chu zana inkhelh theiha buatsaih a ni dawn tiin zan lama thalaite ten mobile an khawih reng ai chuan sports hmanga zan lam an hun hman tangkai theih dan te ngaituah a tul thu a sawi.

AMC Mayor Pu Lalrinenga Sailo leh Keifang Lal Lalchuanliana Sailo tupa ni bawk pawhin thusawina hun a nei a ni.

Tukin zing khan Sports Minister chuan Keifang khua kum 100 tlin hriatrengna Centenary Park siam leh he Park chhunga Pu R Lalzirliana Jubilee Monument te chu a hawng a. Pu R. Lalzirliana Jubilee Monument hi Pu R Lalzirliana, Term nga(5) lai bial ngai atanga MLA thlan tlin a nihna hriatrengna niin he Monument ah hian politics lama a sulhnu leh hnathawh te ziah lan a ni.