Vawiin khan Sports' Minister Pu Zodintluanga'n Kolasib Sports Stadium ah MLA Cup Football Tournament a khar. 

Khuallian chuan Sawrkar in thalaite hmakhua a ngaituah a, kawng hrang hranga thalaite hmasawnna tur chu Sawrkar in hma a la chho mek zel ani tiin infiamna kawngah pawh Sawrkar chuan District hrang hrang ah hma ala chho mek zel a, infiamna hmunhma leh training tha tak hnuaiah Mizo thalai chhuanawm tak tak an chawr chhuak chho zel chu lawmawm a tih thu a sawi bawk. Kolasib Nula Lalremsiami'n Hockey infiamna kaltlangin khawvel ah Mizoram min ti hmingtha em em a, tun hma a Infiammi chhuanawm tak tak nei thin Kolasib District chuan inkhelhna tual zawl tha an nei chu chhawr tangkai sela mahni inthunun theihna, tum ruhna leh thawhrimna nen Mizoram ti hming thatu infiammi thalai chhuanawm tak tak chawr chhuak zel se a duh thu a sawi bawk a ni.

Khualzahawm Bialtu MLA ni bawk Pu PC Zoram Sangliana chuan MLA Cup Inter Village Council Football Tournament hlawhtling taka huaihawt ani chu lawmawm a tih thu sawiin , Kolasib thalai te tan Stadium tha tak ruahmansaktu Sawrkar leh Sports' Minister Pu Zodintluanga chungah lawmthu a sawi bawk a  ni. Bialtu MLA chuan khelmual tha an nei chu thil lawmawm tak a nih rualin thalaite tana chona pe tu nise a duh thu sawiin zuk leh hmuam, vaihhlo leh ruihthei thil laka fihlima mahni taksa hriselna a tan bakah Mizoram tih hming that nan infiamna leh infiamna tualzawl chu  Kolasib thalaiten hmang tangkai se a duh thu a sawi bawk a ni.

MLA Cup Inter Village Council Football Tournament hi July ni 17 khan khelh tan niin Mipa VC Team 14 leh Hmeichhe VC Team 9 ten inelna an hmachhawn a, Mipa Team a champion chu Tumpui VC niin lawmman pawisa fai cheng 50,000/- leh Trophy an dawng a, Hmeichhe Team champion chu Diakkawn VC an ni a, Lawmman pawisa fai cheng 20,000/- leh Trophy an dawng a ni.