Vawiin chawhma khan Mizoram Board of School Education (MBSE) Secretary Pu Lalthangbika kaihhruainain Aizawl District chhunga High School leh Higher Secondary School zirtirtute hnenah Integrated Evaluation Scheme (IES) Software Training Programme, MBSE Conference Hall, Chaltlang-ah neih a ni.

Integrated Evaluation Scheme (IES) hi zirlai naupangte Internal Mark Record dan chungchang a ni a. IES hi Kum 2016-2017 Academic Session atangin High School-ah hman tan niin, Higher Secondary School-ah Kum 2017-2018 Academic Session-ah hman tan a ni ve leh a ni.

IES hian kalphung pangngaia kum tawpa vawi khat exam awm thin kha tibovin, Mark 80 (Final/Board Exam) leh Mark 20 (Internal Exam) hmanga exam neih a ni ta zawk a. He Scheme hnuaiah hian naupangten kum tluana an zirlai chhum lo chat lo va an zir theih nan test leh teh fung dang pawimawh tak tak hmangin school in an vil reng a ngai tawh dawn a ni. Zirna ngawr ngawr bakah naupang hmasawnna leh hriatna tizau thei tur te, naupangten an hriselna lam ngaih pawimawh nachang an hriat theih nan te heng subject- General Studies, Work Education leh Physical & Health Education te hi dah pawimawh an ni bawk a ni.

Mizoram pumah IES hmanga mark lak khawm leh sawr khawm dante rualkhai taka kalpui a nih theih nan leh zirlaiten hmundanga admission criteria hrang hrangah harsatna an tawh loh nana IES Software hi siam a ni. IES Software ah hian mark enter hnuah Best of Two, Average leh Total te a scale down dawn a ni. IES Software school tinah Compact Disc-a sem a ni ang a, computer thiam leh school aiawha lokal te pawhin midang hrilhchhawnna lama hma la turin ngen an ni bawk a ni.
 
IES Training Programme hi District 7-ah kalpui tawh niin, Aizawl District-ah hian naktukah khar a ni ang. Zirtirtu 131 sawm niin, vawiinah hian mi 70 in Training hi an kal a ni.