Vawiin khan Ruihhlo Do Core Committee chu an Chairman Chief Minister Pu Lal Thanhawla hovin a vawikhatna atan CM Office Conference Hall-ah an thukhawm. He committee hi ruihhlo do chungchanga sawrkar, kohhran leh YMA inrawnkhawmna 4.8.2017-a neihin State Level Core Committee on Ruihhlo Do din ni se tih a lo rel tawh bawhzuia din a ni. Vawiin meeting-ah hian Home Minister Pu R. Lalzirliana, Law & Judicial Minister Pu Lalsawta leh Social Welfare Minister Pu P.C. Lalthanliana te bakah member dangte an tel tha hle a ni.

Chief Minister chuan ruihhlo leh a kaihhnawih thil ti an tam zel chu a pawiin a dona kawngah nasa taka hmalak tlan tul a tih thu a sawi a. Mizoram chu ram dang pahnih nen a inri a nih bakah heng thenawm ramah hian ruihhlo leh ruihhlo a sumdawnna hi a hluar hle a, Mizoramah pawh thenawm ram atangin ruihhlo a lo luh hle a ni tiin, state ralmuan avang te pawh a ni theih thu committee chairman  chuan a sawi a. Sawrkar ang pawhin nasa tak a tan lak a ngaih thu te, thalai duhawm tak takte ruihhlo bawiah an tan belh zel loh nan theihtawp chhuah a tul hle a ni tiin Chief Minister chuan tun kum hnih khat chhunga ruihhlo tawlhtu man zinga 90% chuang chu court in thiamloh a chan tir tawh thu sawi bawk a. Awmze nei taka hmalak a nih theih nana kalphung duang turin member te chu a sawm a ni.

Vawiin committee hian hruihhlo a lo rem a, ruihhlo ti thar an tlem theih nan leh ruihhlo ngaite enkawl kawngah te hmalak ni se tiin, chet lak dan ngaihtuah turin sub-committee a ruat a. Inhrilhhriatna lamah tan lak nasat a tul zia tanrual a pawimawh thu sawi a ni.

Ruihhlo Do Core Committee ah hian Chairman chu Chief Minister niin, CYMA President leh MKHC General Secretary te chu Vice-Chairman an ni a. CYMA General Secretary chu Member Secretary niin, member ah hian Home Minister, Law & Judicial Minister, Social Welfare Minister, Chief Secretary, DGP, Law & Judicial Secretary, H&FW Principal Director, Social Welfare Director, Excise & Narcotics Commissioner, MSACS Project Director, MJA President, CYMA OB te leh MKHC OB te an ni.