Vawiin khan Lunglei SAI Extension Centre, Electric Veng-ah national, regional leh state level-a titha bik infiammi te hnenah HPC Sports Incentive Cash Award chu Sports Minister Pu Zodintluanga'n a hlan.
HPC Sports Incentive Cash Awards Committee Chairman Pu R.Lalrosanga kaihhruai inkhawmah Pu Zodintluanga chuan thu sawiin Lunglei District chhunga infiammi thalaite tan High Powered Committee Vice-Chairman Pu Joseph Lalhimpuia hovin hetiang chawimawina leh lawmman siamsak an nih hi a lawmawm hle a ni, a ti. Mizoram pumpuiah sorkarin Sports hmasawn nan tan nasa takin a la chho zel a, a bik takin district-ah te phei chuan hmasawnna leh sports hmun tharte leh thuamthat hna tam tak hmuh tur a awm tawh a ni, a ti bawk. Lunglei District huamchhungah pawh playground engemawzat chei that mek te, volleyball court, Sports discipline hrang hrang zirna SAI Centre, Indoor Stadium leh Gym changtlung tak te a awm chho mek zel a, hengte hi infiammi thalaiten hmang thiamin duat leh dim takin enkawl se a duh thu Minister chuan a sawi a ni. Lunglei-ah SAI Centre din a nih hnu ringawtah pawh national, regional leh state level inelnaah Lunglei District atanga infiammi chi hrang hrangte chuan a zavaiin medal 90 lai an rawn hawn tawh a, hei hian a duai bik lohzia a tilang chiang hle a ni, a ti.
Thu a sawi zelnaah Sports Minister chuan SAI hnuaia sports training nei mek naupang tam zawk chu thingtlang atanga thlanchhuah an nih thu a sawi a; Sports hrang hranga Coach leh Manager-te chuan Mizoram dung leh vang fangin talent nei thate an thlang chhuak a, chungte chu sorkar-in a enkawl puitling turin an hruai khawm thin thu a sawi a. Mizo football players 360 chuangte chu India ram hmun hrang hrangah Football Club-te an zawm a, heng zinga 60% te chu thingtlanga mi an ni, a ti. Khawvel pum huapa infiammi thiam ber berte fuankhawmna thin Olympics 2016-ah chuan Mizo nula emaw tlangval emaw pakhat tal ram aiawha khel thei tura inbuatsaih chho mek a ni thu sawiin Pu Zodintluanga chuan table tennis-ah Mizo player hmeichhia 1 chu Olympic team-ah tel theih tura beiseiawm tak chu sorkarin rampawnah training tura tirhchhuah a tum thu a sawi a. Sports discipline dangahte pawh hetianga talent nei tha leh beiseiawmte tan chuan sorkarin theihtawp chhuah a inhuam a ni, a ti. Sports Minister chuan Mizorama chanchinthar thehdarhtute pawhin khawvel huapa infiammi lar tak takte chanchin ringawt ni lovin Mizo player hlawhtling leh beiseiawm tak tak te chanchin ziak/puang uar se a duh thu a sawi bawk a ni.
Lunglei High Powered Committee chuan kum khatah Sports Incentive Cash Award atan nuai khat a dah thin a. Vawiina sem tak HPC Sports Incentive Cash Award hi a tum hnihna a ni a, a hmasa zawk chu 1st April 2012 - 30th September 2012 chhung huamin kumin April ni 11 khan infiammi ti tha zual 37 hnenah sem a lo ni tawh a. Vawiina Cash Award dawngte hi judo, football, boxing, badminton, table tennis leh karate infiammite hnenah pek a ni a, heng zingah hian India ram aiawha khel pha te, Inter-State level-a 1st atanga 3rd position hauh te leh Mizoram State Level inelnaa lawmman 1-na la te hnenah sem a ni.
