4609/2025-2026

Dated Aizawl, 26^th February 2026: Vawiin khan Sports & Youth Services Minister Pu Lalnghinglova Hmar chuan Empowering Mizoram Sports hnuaia training/coaching dil duhte’n mobile phone hmanga awlsam zawka dilna an theh luh theihna tura duan EMS website ‘ems.mizoram.gov.in’ a tlangzarh. Tlangzarhna inkhawm hi Minister Office Chamber-ah buatsaih niin Sports & Youth Services Department leh Mizoram State Sports Council hotute leh mi pawimawh dangte he hunah hian an tel a ni.

Minister chuan EMS chu Mizo thalaite’n infiamna lama hma kan sawn theihna tur leh kum 2036-a India-in Olympic Games a thlen tura Mizo thalai tam lehzual an lan theihna tura sawrkar hma lakna pawimawh tak a nih thu sawiin Mizoram pum tuamchhuak sports coaching leh talent haichhuahna liantham kalpui tum a nih thu a sawi a, hmun kilkhawr zawka naupang kum 8 – 15 inkar talent nei tha tak tak, training mumal dawng si lote chu zawn chhuah a, an bana kaih a, Mizoram leh India aiawh thei tura chher chhuah tum an nih thu a sawi.

Empowering Mizoram Sports chungchanga hriattur pawimawhte:

EMS hi January 14, 2025 khan Chief Minister Pu Lalduhoma’n a tlangzarh a, a taka kalpui turin hma lak chhunzawm nghal niin December 1, 2025 khan Home Minister Pu K. Sapdanga hovin Ramhlun Indoor Stadium-ah Kick-off hun hman a ni a. December, 2025 vek khan ‘Trainers Training’ buatsaih niin JICA India nen tangkawpin Hawla Indoor Stadium-ah ‘Coach Development Programme’ buatsaih a ni bawk a. Nippon Sports Science University, Tokyo atangin sports coaching a mi thiam bik, Professor Masumitsu Ito leh a thuihhruaite’n Mizo coach 40-te zirtirna an pe a ni. Mi tam lehzualin an hlawkpui theihna turin Online-a coach dil theihna EMS website chu vawiin February 26, 2026 hian hawn a lo ni leh ta a ni.  

Mizoram sawrkarin hmathlir mumal tak nei chungin sports-ah hma a la mek zel a. A bulthut atanga infiammite zirtirna pek chu ngaih pawimawh niin India-in khawvel huap inelna sang, Olympic Games 2036 a thlen turah pawh Mizo thalaite an tel ve theihna turin Empowering Mizoram Sports (EMS) pawh hi ‘Vision 2036 Olympic Games’ nei chunga duan leh kalpui tum a ni. 

1. EMS kalpuina tur hi 'The Mizoram Bana Kaih (Hand holding) Scheme' hnuaia 'Participative Planning and Innovations for Sustainable Development' component atangin Rs. 2,50,00,000/- (Rupees two crore and fifty lakhs) sanction tawh a ni.
2. EMS hnuaiah hian Mizoram hmun hrang hrangah naupang kum 8 - 15 inkarte chu basic coaching pek an ni dawn a, coaching hi ni 15 chhung atan niin, nitin darkar 3, a vaiin darkar 45 pek an ni dawn a ni. 
3. Kum 8-15 inkar target an nih chhan hi, kum 2036-a taksa leh rilru that vanglai thleng tur 'age group' an nih vang a ni.
4. Mizote thiam zawng, khawvel huapa India a thatna ni bawk (Olympic qualification hnaihna nia ngaih) sports discipline-te chu EMS hnuaiah ngaihpawimawh an ni ang. Chungte chu:
   
   i) Archery
   ii) Judo
   iii) Boxing
   iv) Hockey
   v) JudoBadminton  
   vi) Taekwondo 
   vii) Weightlifting                                      
   viii) Wrestling
   
   
5. EMS hi Public-Private-Partnership (PPP) mode-a kalpui tur a ni a. Sawrkarin coach-te leh an hlawh bakah sports equipment a tum ang.
6. Coach duh khua/veng te'n EMS website kaltlangin online in dilna an thehlut ang a, a remchan dan ang zelin, tumah duhsak bik awm lovin coach-te tirh chhuah thìn an ni dawn a ni. Coach diltu khawtlangin coach-te veivahna (sumo fare), thlenna leh coaching an pek chhunga an ei leh in an tum ve ang. Hei hi khawtlangin neitu rilru an put a, theihtawp an lo chhuah ve theih nana ruahman a ni.
7. EMS hi phase hrang hranga kalpui tur a ni a. Ni 15 training-a tel naupangte tan district leh state level inelna buatsaih a ni ang. Heng inelnaa che tha leh theihna nei sang bikte chu residential mode-a uluk lehzuala training/coaching pek tura ruahman a ni.  
8. Documentation, data, grading system, feedback pekna mumal tak nen kalpui tur a ni dawn a. Hemi atan hian Consultancy firm (Angels Business Promoter) nen tangkawpin EMS website siam a ni. Website hi hman nuam leh awlsam, a pawimawh chin fun kim bawk tura siam a ni. 

EMS website hmanga training dil dan: 

1. EMS website https:/ems.mizoram.gov.in ah lutin, ‘Training Dilna Form’ tih hnuaiah mahni khua/veng, District hming leh RD Block chhutluh tur a ni. 
2. Biakrawn ber tur hming leh biakpawhna tur number dah tel bawk tur a ni.
3. Training duhna sports discipline chhutluh leh tur a ni a, pakhat aia tam dil duh tan ‘add discipline’ tih hmeh zel tur a ni. 
4. ‘Hriattur pawimawh’ tih uluk taka chhiar zawhah, ‘submit’ hmeh tur a ni.  
5. Hrechiang duh tan phone no. 8132098626-ah zawh chian theih reng a ni.

EMS hnuaia coaching/training petu turte hi State-level Sports Association-te nen tangkawpin thlan an ni. 

Empowering Mizoram Sports kaihhnawiha hmalakna dangte:

1. Grassroots Sports Development Programme (GSDP): 

EMS hmalakna pakhatah January ni 13, 2025 khan Mizoram State Sports Council (MSSC) leh Samagra Shiksha Mizoram (SSM) te chuan Memorandum of Understanding (MoU) an ziak a. He MoU hmang hian Grassroots Sports Development Programme (GSDP) chu August 21, 2025 atang khan Mizoram hmun hrang hrangah hlawhtling takin kalpui mek a ni. 

GSDP in a tum ber chu sawrkar school-a sports training mumal taka kalpui a ni a. Mizorama centre 46-ah, kum 6 atanga kum 14 inkar zirlai 1000 chuangte chu sports discipline thlan bikah zirtirna pek niin, theihna nei sangte tan EMS nen tangkawpa kawng inhawng zel tura ruahmanna siam a ni.

2. Tuipuiral Games leh Tuichangral Games-a sports discipline telh belh: 

Empowering Mizoram Sports kalpui dan tur enchhin nan Tuipuiral  leh Tuichangral Annual Sports Meet-ah te Olympic-a tel ve theihna tur hnaivai nia ngaih sports discipline telh thar a ni a, a hmuna training pek chilh a ni bawk.

1. Tuipuiral Games 2025 ah Boxing leh Archery. 
2. Tuichangral Games 2025 ah kum 8-16 inkar tan Boxing, Wrestling leh Weightlifting. 
3. Tuipuiral Games 2026-ah kum 16 hnuailam tan Boxing, Archery leh Weightlifting. 
4. Tuichangral Tournament 2026, April thlaa Khawhai-a neih turah kum 8-16 inkar tan Boxing, Wrestling leh Weightlifting telh a ni ang. 

Mizoramin Best Upcoming State for Promoting Sports and Physical Education Award a dawng 

Confederation of Sports and Recreation Industry (CSRI) buatsaihin January 15, 2026 khan India International Centre, New Delhi-ah "National Ranking Awards Ceremony” neih a ni a. He hunah hian awmze nei leh hmathlir thui tak neia Mizoramin sports a kalpui chhoh mek chu hriatpui niin, sports chawi kan leh tih hmasawn kawnga hma la tha chawimawina, “Best Upcoming State for Promoting Sports and Physical Education” lawmman a dawng nghe nghe a ni.