Aizawl, 27th November, 2020: Nimin November ni 26, 2020 khan Sports, Youth Affairs, Tourism & ICT Development Board chu a tum hnihna atan Board Chairman Pu Robert Romawia Royte, Minister hovin Secretariat Conference Hall ah an thukhawm a. Board hnuaia department pathum - Sports & Youth Services, Tourism leh Information & Communication Technology Department hmalakna leh hmachhawpte an thlir ho a ni.

Board member te chuan Sports Department hnuaia hmalakna tam tak zinga a langsar zual - Sports Policy, 2019 te, Sports Industry nihna pek te, Fit Mizoram Programme neih te, Mizoram State Games, 2019 hlawhtling taka neih te, Non-Residential Coaching Camp, Khelo India Scheme hnuaia India ram State pariat thlan chhuah zinga Mizoram a tel chu lawmawm an ti a. PMJVK atang te, North Eastern Council atang te, Khelo India Scheme atangte in sum tam tak hmua Sports Infrastructure engemaw zat siam mek leh siam zel tum a ni chu member ten lawmawm an ti hle a ni.

Meeting ah hian Tourism department hmalakna leh hmasawnna țhenkhat te sawiho a ni a. Chumi zingah chuan Allocation of Business Rules 2019-in mawhphurhna tam lehzual a pek zul zuiin hna thawh mek a ni a. Mizoram Responsible Tourism Policy 2020 te, Mizoram (Regulation of Tourist Trade) Rules 2020 te, Caravan Tourism, Dormitories, Homestay, Travel Agent, Tour Operator leh Tour Guides Kaihhruaina mumal tak siam te, Council of Minister-a pharh tur Aerosports Rules, River Rafting Rules leh Mizoram Eco-tourism Policy 2020 siam mek te chu sawi lan a ni a. Reieka Adventure Theme Park, Thenzawl Golf Course siam zawh tawh te, Meet the Heroes, Anthurium Festival leh Winter Festival hlawhtling taka hman a ni te, Zo fate insuihkhawm lehna tura hmun hrang hranga Zo Kutpui hman a ni te, Management Development Institute, Gurugram (Delhi)-in Mizoram chu Happiest State-a a thlang te, Travel + Leisure India & South Asia-in Mizoram chu Best Green State-a a puang te chu Board member ten lawmawm an ti hle bawk a ni.

He meeting-ah hian ICT Department in hma a sawnna tam tak zingah Telecom Infrastructure Policy thar siam a nih thu te, School thlan bik 150 te hnenah Computer set 7 leh Multi Printer tha tak pek an nih thu te, Mobile Tower awm lohna hmuna Tower tam zawk dah te, M Covid-19 Apps siam te, Department hrang hrang tana Webside siam te, HSLC Examination-a Top Ten te hnenah chawimawina leh lawmpuina Laptop pek theuh an nih thu leh Telecom network service providers te nen inpawh taka hmalak thin a nih thu te sawi lan a ni a.

Sports, Youth Affairs, Tourism & ICT Development Board hian department pathumte mamawh leh project thenkhatte SEDP thuneitute hnenah thlen ni se an ti a. Heng department pathum - Sports & Youth Services, Tourism and Information & Communication Technology Department hnuaia infrastructure development hnathawh hrang hrangte chu a hmunah kal chilha an hnathawhte zir chian ni se tiin an rel a. Covid-19 hripui leng avanga ramin harsatna nasa tak a tawh lai leh sum leh pai indaih lohna a nasat em em laia Central Ministry-a project hrang hrang siama sum tam tak Mizoram sorkar Finance department-a heng department-in a chhunglut hi Board meeting chuan lawmawm a tiin hmasawnna hna thawh tan chhoh ni se an ti bawk.

He meeting hi Board Chairman Pu Robert Romawia Royte, Minister-in kaihruaiin, Board Vice Chairman Pu T.C. Pachhunga, Board Secretary Pu H.Lalengmawia te bakah Board member thahnem tak an tel a ni.