No.6680/2020-2021

Dated Champhai, the 27th November, 2020: Tukin khan Law & Judicial Minister Pu T.J. Lalnuntluanga, Champhai South bialtu MLA ni bawk chuan  Champhai Vengthar leh Zote inkar inkalpawhna kawng siam tur chu tlawhin, kawng awmsa  tihlen leh cheihnum dan tur  official-te leh khawtlang hruaitute nen an enfiah. Minister hi Er. H.Lalzirliana, MLA, Vice Chairman, Road & Infrastructure Development Board chuan a tawiawm a ni.

Pu T.J. Lalnuntluanga chuan Covid-19 hrileng  vangin duh anga hmalak a harsat rih thu sawiin,  ngaihmawh leh tul tih zawngte hlenchhuah vek theih ni lo mahse a theih anga bawhzui zel tum anih thu a sawi a.   Kawng siam tur chu nakin zel ngaihtuaha Champhai leh a chhehvel khuate tana chhawrnahawm tak tur anih vangin hna  thawh bul tan  nan MLA fund atanga cheng nuai 10 a pek dawn thu sawiin,  Vengthar leh Zote inkalpawhna kawng pawimawh tak chu laihzau hmasak hnuah metal road a siam tum a ni, a ti.    Khawtlang anga tanrual a ngaih hle dawn thu pawh sawiin, hlep leh hamthatna dang inrawlh buai lova khawtlang tana rotling din kawngah theihtawp chhuah hova tanlakpuiah khawtlang mipuite a sawm nghal bawk a ni.

 Law & Judicial Minister tawiawmtu Er. H.Lalzirliana, MLA, Vice  Chairman, Road & Infrastructure Development Board chuan hmasawnna ruhrel tha leh tlo nei turin khawtlang anga tanho thiam angaih thu a sawi a.  Neitu thinlung pu chunga bialtu MLA leh mipuite thawhhona tha tak chu fakawm a tih thu sawiin, PWD chuan kawng tha nei tura tan a lak zel dawn thu a tarlang bawk.

Champhai Vengthar-Zote inkalpawhna kawng siam mek  vil turin  Vengthar Branch YMA  chu ruat an ni a, PWD Engineer-te a tul anga endik pui tura tih an bawk. Champhai Vengthar leh Zote khaw inkar kawng Kilometre 1.6 a thui hi metre 8 atanga metre 9 vel thlenga tih zauh tum a ni a, a remchan dan ang zela tihchangtlun tum a ni. He kawng hi Champhai leh a chhehvel Hnahlan tlangdung khua te’n awlsam leh hnai zawka Champhai khawpui an luh leh chhuah theihna kawng tangkai tak a ni.

Hemi hnu hian Minister hian GM Higher Secondary School NSS hruaitute nen New Champhaia Waiting Shed sakna tur hmun an enho nghal bawk. 

Law & Judicial Minister hi  Pu Vanlalchhuanliana DUDO, Pu Eddie Zothansanga, EE, PWD,  Dr. Lallawmkima DIPRO, Official dangte leh khawtlang hruaitu te’n an tawiawm a ni.