4057/2022-2023  
Aizawl the 31st March 2023: Vawiin khan Hrangbana College chuan 21st MZU Annual Sports Meet neih zawh taka an champion lawmna chu Golden Hall, Hrangbana College, Chanmari ah an nei a, Sports and Youth Services Minister Pu Robert Romawia Royte chuan Khuallian niin a hmanpui.

Minister Pu Robert Romawia Royte chuan MZU Annual Sports-a Hrangbana College in hlawhtlinna an chang chu a lawmpui thu a sawi a. Mizoram University chu a dinna la rei lo mahse kawng engkimah a hma a sawn tawh hle tih sawiin Minister chuan Hrangbana College chu hemi kawnga thawh hlawk ber te zinga mi an ni a ti.

Khuallian chuan infiamna leh zirna a inkungkaih tlat thu sawiin zirna a hmasawn tur chuan taksa sawizawi that a tul hle a ni, a ti a. Sawrkar pawhin a pawimawh zia hriain New Education Policy 2020 ah infiamna tih thumal chu vawi 30 lai a inziah thu a tarlang bawk. Mizo thalai hrisel, zangkhai leh zuanzang chherchhuah chu Sawrkar thiltum pawimawh tak a ni tiin zirlaite chu kawng engkimah fimkhur a insum fo turin a chah a ni. MZU Sports Meet-a HBC hlawhtlinna chu a lawmpui rualin chapo nan leh induh nan hmang lo turin a fuih a, an kal zelna turah inrintawkna leh chona tha tak petu ni zawk se a duh thu a sawi bawk a ni.

21st MZU Annual Sports Meet a champion lawmna ah hian Hrangbana College Principal Pu Lalrochuanga Pachuau pawhin thusawi tawi a nei bawk a. A pension thlaa an champion thei chu inthlahna thilpek ropui ber a ni, a ti. He hunah hian main sponsor Pu Lalpekzuala (Mizo car bazar) leh Dr. Saugata Sarkar, Mizoram University Sports Board Secretary te pawhin thu an sawi bawk a ni.