4056/2022-2023

Aizawl the 31st March 2023: Vawiin khan Mizoram State Commission for Protection of Child Rights (MSCPCR) buatsaih lehkhabu ‘Naupang dikna chanvo kaihnawih inkaihhruaina’ (Child Rights Information & Resource Directory) tlangzarh inkhawmna chu PHQ Multipurpose Hall, Khatla, Aizawl ah neih a ni a, Social Welfare & Tribal Affairs Minister Er. Lalrinawma chu khuallian niin, lehkhabu tlangzarhna hi a nei a ni.

Khuallian chuan lehkhabu ro tling leh chhawrawm tak tlangzarh anih theih nan a theihtawp chhuah a thawk thin, Mizoram State Commission for Protection of Child Rights (MSCPCR) -te chungah lawmthu sawiin, hlawk leh tangkai taka hman anih ngei a beisei thu a sawi a ni. Khawvelin naupangte dikna chanvo a ngaipawimawh hle a, an dikna chanvo humhalhna dan a siam hial a, United Nations Conventions on the Rights of the Child (UNCRC) thuthlung ziah niin ram 196 ten an ziah tawh thu leh India ram pawh a tel thu a tarlang a. Mizoram ah pawh naupangte humhalhna dan hrang hrang a awm a,heng dan te hi dik leh chak tak a kenkawh anih theihnan sawrkar, NGO leh Kohhran te thawk ho zel turin a ngen bawk a ni. Naupangte dikna chanvo humhalh hi sawrkar leh dan kengkawhtute kut chauh ni lovin, mitin mawhphurna anih thu sawiin, naupangte dikna chanvo humhalh kawng a penchhuak turin Zoram mipui te a sawm nghal a ni.

Minister chuan, naupangte hi ram rohlu leh nghahfak an ni a, anmahni enkawl leh venhim hi puitling zawk te mawhphurna a nih thu a tarlang a. He mawhphurna hi nu leh pa tam takin an hlen thin loh avangin, naupang tam tak dikna chanvo chu rahbeh leh palzutin a awm fo thin a ni, a ti. Naupangte tha taka an seilen theihna turin chhungkua leh khawtlangah hma thar chhuah zel a ngaih thu sawiin, a bik takin chhungkaw inenkawlnaah nu leh pa ten tan lak thar a ngai a, ei leh in tha pek bakah zalen taka an thanlen nana an dikna chanvo hrilhhriat kawngah leh an harsatnate sutkian anih theih nan chhungkuaah inzirtirna tha neih uar a ngai a ni, a ti. Mizoramah ngei pawh naupang hlamchhiah, fahrah, pawngsual leh khuaikhem tawk an awm fo a, mi tam takin tanpui duh thin mahse, hmalak dan an hre lo fo thin a ni a ti a, hemi kawng ah hian vawiina lehkhabu tlangzarh tak hian nasa takin a pui thei dawn a, naupang dikna chanvo humhalh kawngah mizoram in bung thar a kai ngei a beisei thu sawiin, chhungkaw tinin he lehkhabu hi kawl se a duh thu a sawi a ni.

Er. Lalrinawma chuan, fa neih tam kawngah pawh tan lak a ngai hle a ni, a ti a. Khawvela hnam boralta te hi an tlem vang ani fo a, chuvang chuan hnam boral lohna turin fa neih tam a pawimawh hle a ni, a ti. China ramin fa pakhat neih an kalpui uar hle a,tunah mangang takin an awm mek a, khawthlang ram te pawh naupiang tlem avangin harsatna tam tak an tawk mek a ni, a ti a. Mizo te hi pun chak a pawimawh rualin ,fa neih ringawt hi a tawk lo a, anmahni enkawl leh an dikna chanvo venghim kawngah theih tawp chhuah turin zoram mipuite tan I la thar ang u tiin a sawm nghal bawk a ni.

Khualzahawm Pi Donnie, Addl.Secretary, (SW & TA) pawhin thu sawiin, vawina lehkhabu tlangzarh tak chuan naupang dikna chanvo humhalh kawngah inzitirna tha zawk a thlen dawn a ni, a ti a. Harsatna tawk naupangte leh anmahni tanpui duhtuten awlsam zawk a thuneitu an hrilhhriat zung zung theihna tur anih thu a sawi a, naupang dikna chanvo humhalhna kawngah hmasawwnna chhuanawm tak a ni, a ti.

Dr.Julie Remsangpuii Fambawl, Member, MSCPCR-chuan lehkhabu sawihawnna (review) neiin, he kehkhabu hi hlawm lian pui pahnih a then a ni, a ti a. Then khatna ah hian danin naupang a bika enkawl leh venhim ngai a tarlante an awm a, then hnihna ah hian naupang tanpuina pe thei te tarlang a ni, a ti. He lehkhabu ah hian sawrkar, mimal leh pawl hming-naupang dikna leh chanvo humhim sak kawnga pawimawh te tarlan a nih thu a sawi bawk.

Vawiina ‘Naupang dikna chanvo kaihnawih inkaihhruaina (Child Rights Information & Resource Directory) tlangzarhna inkawm hi Pi Varte Varthanpuii, State Child Rights Coordinator, MSCPCR chuan kaihruaiin, Dr. C.Lalsangzuala, Chairperson, MSCPCR, chuan kawlkhawmte lawmna  thu a sawi a, Pi Lalengvari, Secretary, MSCPCR chuan lawmthu sawina neiin hun a  khar a ni.