4055/2022-2023

Lunglei the 31st March' 2023: Lunglei Municipal Council (LMC) Election 2023 atana vote chhiar chungchanga mawhphurhna neitu te Counting Supervisor, Counting Assistant leh Additional Counting Assistant te pualin vawiin khan Convention Centre Hall, Lunglei ah a vawihnih na atan training neih a ni. He hun hi Pi Ramdinliani, IAS, Lunglei District Municipal Election Officer leh Deputy Commissioner ni bawk chuan a hman pui.

LMC Election Vote chiar dan training inkhawm hi Pi C. Lalduhzuali, Election Officer, Lunglei chuan kaihruaiin Pi Ramdinliani chuan LMC Election 2023 chu March ni 29 khan harsatna liantham awm lovin tluang tak a vote thlak zawh a ni a, polling party te hnenah lawmthu a sawi a ni. LMC Election a hmawr bawk nan tluang tak leh lungrual taka vote chhiar kalpui turin counting official te a sawm a ni.

Pu Vanlalrova, Secretary, Lunglei Municipal Council, Lunglei leh Master Trainer ni bawk chuan vote chhiar dan tur chungchang training a pe a, Pu Vanlalchhuanawma, District Transport Officer leh BDO,Lunglei ni bawk leh Pu Denny Lalchhuanawma, BDO, Bunghmun, Master Trainer ten EVM leh Ballot Unit hman dan practical training an pe bawk a ni. LMC Election hi 29th March 2023 ah zawh tawh niin 3rd April 2023 zing dar 10 AM atangin vote chhiar tur a ni. Saikuti Hall, Ground Floor ah Counting Hall siam a ni ang a, Counting Hall - I ah Table 12 dahin Ward No. I,II,III,IV,V te vote chhiar a ni ang. Counting Hall - II ah table 12 dahin Ward VI, VII,VIII,IX,X,XI te vote chhiar a ni ang. Vote chhiar ni hian Postal Ballot chhiar hmasak a ni ang a, chumi hnu ah EVM chhiar tur a ni.

LMC Election a vote chhiar tur training te hi Counting Supervisor 30, Counting Assistant 60 leh Additional Counting Assistant 30 te an ni.

Vote chhiar ni hian official duty tur te chu LMC Election 2023 Identity Card tello chuan Saikuti Hall ah luh phal a ni dawn lo a ni.