4054/2022-2023
Mamit 31st March, 2023 : Vawiin khan Govt. Mamit College, College Day vawi 40-na pualin GMC Hall-ah hun hman a ni.

Pu M.S Dawngliana Hnamte, Principal, GMC chuan Mamit College-in kum 40 hmel a lo hmu ve ta chu a lawmawm hle a, Mamit khawtlang leh khawthlangin zirna kawnga hmasawnna hmel kan hmuh theih nana, khawtlang nu leh pa thahnemngai rualawt te'n harsatna awm thei angte hmachhawn inhuama an lo din Mamit College chuan hmasawnna hmel a hmu chho mek zela, sulsutute vawiin hian zahna chibai kan buk thar leh a ni a ti.

Zirna In tha nei turin Building tha ringawt a tawk lova, Infrastructure tha a pawimawh rualin, zirlaite leh zirtirtute kan pawimawh a ni tiin, zirtirtute pawhin kan pawimawhna kan hriat thar a, thahnemngai lehzuala thawk tur leh Mamit College-in kawng hrang hranga hmasawnna hmel a hmuh theih nana kan theihna zawn theuha tan la thar turin kalkhawmte a sawm a ni.

He hunah hian Dr. Lalnghakmawia Thangluah chuan MZU Sport neih zawh taka Medal semna hun a hmang nghal bawk.

Govt. Mamit College hi Kum 1983 April ni 1 khan khawtlang nu leh pa kal khawmin an din a ni a. A tirah chuan Private College niin zirtirtu leh zirlai tlem te nen Middle School leh Primary School-ah te class kal thin a ni. Zawi zawia hma sawn zelin tunah chuan NAAC B+ Accreditation neiin infrastructure changtlung tak leh zirtirtu leh zirlai thahnem tak neiin, he College hian hmasawnna kawng a zawh mek a, tunah hian zirlai 160 awmin, thawktu 32 an awm mek a, Subject 7 (pasarih) zir theihna a awm mek a ni. College Day ni 1 April hi Inrinni a nih avangin vawiin Zirtawpni hian hman a ni.

College Day vawi 40-na pual hian zirlaite'n Cleanliness Drive nei zui nghalin Mamit khawpui chhung hmun hrang hrangah Plastic bakah bawlhhlawhte chhar faiin hun hman zui a ni.

College Day hmanna hun hi Pu Kh. Arun Kumar Singh, Head Department of English, GMC chuan kaihruaiin Dr. A.I Meetei, Head Department of Education, GMC chuan lawmthu sawina a nei a ni.

Attachment

  • Loading attachment...