4053/2022-2023

Aizawl the 31st March 2023 : Vawiin khan Commerce and Industries Minister Dr R Lalthangliana chuan tlangrama in him leh tlo, lirnghin thulh pawha chhe mai lo tur insak dan tur zirhona “Sustainable Construction and Earthquake Resistant Design of Structures on Hilly Slopes” tih thupui hmanga workshop buatsaih a hmanpui. Ni nga (5) awh tur he workshop hi Civil Engineering Department, National Institute of Technology (NIT), Mizoram buatsaih niin hawnna inkhawm hi Regency Hotel ah neih a ni.

Dr R Lalthangliana chuan Mizoram hi tlangram a nih avangin building tam zawk hi tlang pangah sak a ni thin a. In sakna tur hmun zawl zau tha hmuh tur a tam lo a. Lirnghing nasa tak thlen theihna Seismic Zone V a awm a ni bawk a. Chuvangin, vawiin workshop ang hi Mizoramin a mamawh hle, a ti a. He workshop neih a nih theihna tura hmalatute lawmthu a hrilh a ni. Minister chuan India ram hmun hrang hrang atanga Institution tha leh rintlak atanga mithiam lo kal te hnenah lawmthu a sawi a, he workshop pawimawh taka tel zawng zawng te hlawk taka hun hmang turin a chah. Science thiamna hi sang hle mahse lirnghing erawh chu engtikah nge a thlen dawn tih hi tute mahin an sawi lawk thei lo; chuvangin, lirnghing pawh lo thleng se, building tam tak chhe tur laka inven nan lirnghing dawl zo in sak dan kan thiam a pawimawh tak zet, Minister chuan a ti a. Lirnghing thlen tawhna ram te thlirin, insak fimkhur lo leh ngheh lohna apianhah an tuar nasa a, earthquake resistant design hmanga in sak hi a pawimawh tak zet a, insak kan uluk a ngai hle a ni, Dr R Lalthangliana chuan a ti.

He huna khual zahawm Er. K. Lalsawmvela, Advisor to Chief Minister (Technical) pawhin thu sawiin Mizoram hi state naupang te a ni a, engineering thiamna lamah pawh a la naupang a, RCC building din tanna pawh a la rei lo hle a, chutichungin thiamna lo pung zelah Mizoram pawhin nasa takin hma a sawn, a ti a. A tawn hriat atangin Mizorama hmasawnna ruhrel hrang hrang, sawrkar building sak dan leh mimal in sak than chhoh dan a sawi a. Workshop a zirtirtu tur mithiam lokal khawmte hnenah lawmthu sawiin, heng institution te hian Mizoram tan mi thiam tak tak rawn tir thinin Mizoram PWD pawhin a tangkaipui hle tih khual zahawm chuan a sawi a ni.

He workshop hian a tum ber chu khua rel chhiatna hrang hrang, a bik takin lirnghing pawh lo thleng se, building tlu sawp leh chhe mai mai thei lo tur, nghet leh tlo taka sak dan inzirtir a ni.

IIT Kharagpur, IIT Roorkee, NIT Mizoram, Thapar Institute of Engineering and Tech, Tata Steel (Tata Tiscon) leh Mizoram PWD atangin mi thiamte an kalkhawm a. Subject pawimawh tak tak sustainable constructions, earthquake resistant design of structures on hilly slopes, modelling and analysis, seismic risk assessment, seismic fragility analysis, structural health monitoring, seismic hazard assessment leh a dang te hmangin mithiamten kalkhawm te an zirtir a.